जनकपुरधाम, असार १८ गते । मधेश प्रदेशको राजधानी जनकपुरधाम सोमवार मध्यराति दुई घण्टासम्म भएको अबिरल बर्षाले डूबानमा परेको छ । वर्षाको पानीले कयौं वडाका घरहरुका साथै सरकारी कार्यालयहरु डूबानमा परेको छ ।
वर्षाले मधेश सरकारको प्रशासनिक तथा आवास रहेको मधेश भवन परिसर जलमग्न छ भने जनकपुरधामस्थित आधा दर्जनभन्दा बढी सरकारी कार्यालयमा पानी जमेको छ । यो संगै बारहविघा मैदान, अस्पतालसहित अधिकांश सडक तथा गल्लीहरूमा पानी जमेको छ । बिहानसम्म जनकपुरधामको ‘सिक्स लेन’ सडकमा आधा पानी जमेको थियो ।
जनकपुरधामस्थित वन कार्यालय, जिल्ला प्रशासन कार्यालय, कृषि ज्ञान केन्द्र, राइजोबियम कार्यालय, संघीय प्रहरी आयोजना केन्द्र लगायतका कार्यालयहरुमा पानीको निकास नभई पानी जमेको छ । पानी जमेको कारण सेवाग्राहीलाई निकै सास्ती भोग्नुका साथै कर्मचारीहरु समेत समस्यामा परेका छन् ।
जनकपुरधामका वडा नम्बर २, ४, ७, ८,९, १० १३ र १६ सहित अधिकांश वडाहरुमा गहिरोमा रहेका घरहरूमा पानी जमेको छ । बाह्रबिघा मैदान र संगै रहेका प्रादेशिक अस्पताल पोखरीमा परिणत भएको छ । जनकपुरको जिरोमाइलस्थित फलमण्डिमा डेढ फिट गहिरो पानी जमेको छ ।
जनकपुरधाम डुबानले गर्दा जनजीवन प्रभावित भएको छ । हुनत सडकको पानी स्थानीयले चेम्बर सफा गर्दा सडकको पानीले निकास पाएपनि कार्यालयहरु गहिरो स्थानमा रहेका कारण अहिलेसम्म पानी जमेको नै छ । वर्षातको पानीले यस्तो दूरावास्था भएपनि जनकपुरधाम उपमहानगरपालिकाले नाला र चेम्बरको सरसफाई गरेनन् ।
जनकपुरधाम उपमहानगरपालिकाको लापरवाही र नयाँ सडक बनेका कारण जनकपुरधाम डूबानमा पर्न गएको हो । उपमहानगरपालिकाले अन्दरग्राउण्ड रहेका नाला र चेम्बरहरुको सरसफाई नगर्दा नालाहरू जाम भएको कारण जनकपुरधाम डूबानमा परेको हो । एक दिनकै वर्षामा जनकपुरधामको यो हविगत भएको अवस्थाले हेर्दा निरन्तर अबिरल भएमा जनकपुरधाम लामो समयसम्म डूबानमा पर्ने सक्ने सम्भावना रहेको छ ।
जनकपुरधामसहित देशका धेरैजसो ठाउँमा पानी परिरहेको छ । देशभर मनसुनी वायुको प्रभावले मौसम पूर्वानुमान शाखाले असार १७ देखि २० गतेसम्म भारी वर्षाको सम्भावना रहेकाले सतर्कता अपनाउन भनेको थियो ।
आउँदो तीन दिनसम्म नै कर्णाली, महाकाली, कोशी, नारायणी, बागमती र यसका प्रमुख सहायक नदीहरू तथा कमला, कन्काई, पूर्वी राप्ती, पश्चिम राप्ती, बबई नदीको जलसतह उल्लेख्य बढ्ने पूर्वानुमान रहेकाले नदी तटीय क्षेत्रका क्रियाकलापमा उच्च सतर्कता अपनाउन मौसम पूर्वानुमान महाशाखाले आग्रह गरेको छ ।
यो विषयमा आफ्नो प्रतिक्रिया दिनुहोस् !