मुक्तानको काकलिङ सार्वजनिक

कवि मुक्तान थेबाको कविता कृति ‘काकलिङ’ शनिबार विमोचन भएको छ । उन्मुक्त पुस्तासँग सम्बद्ध कवि थेबाको कृतिमा तामाङ भाषामा लेखिएका ३८ कविता छन् ।

कृति तामाङ भाषाविद् अमृत योञ्जन, कवि तथा पत्रकार फूलमान बल, कवि विना थिङ र कवि तथा पत्रकार राजु स्याङ्तानले विमोचन गरे । कृतिमाथि टिप्पणी गर्दै भाषाविद् अमृत योञ्जनले सशक्त कवितामार्फत कवि थेबाले मातृभाषालाई समृद्ध बनाएको बताए ।

‘तामाङ भाषामा लेखिएको भनेर मात्र पुग्दैन, कविले सार्वभौम भएर आफ्ना मुद्दा उठाएका छन्,’ योञ्जनले भने । यो कृतिलाई कविले नभई अनुवादकले अंग्रेजी र नेपालीमा पनि अनुवाद गर्नुपर्ने उनको भनाइ छ ।

कवि तथा पत्रकार फूलमान बलले कवितामा दमित समुदायको आक्रोश पोखिएको बताए । उनले भने, ‘यो समय आक्रोशकै हो, आक्रोशलाई सुन्दर ढंगले प्रस्तुत गरिएको छ ।’

कवि विना थिङले कृतिमा महिलाका मुद्दालाई प्रतिरोधी ढंगले उठाइएको बताए । महिलालाई कमजोर पात्रका रूपमा नउभ्याई शक्तिशाली र प्रतिरोधी बनाइनुले कवि थेबा कति सचेत छन् भन्ने देखिएको उनको भनाइ थियो ।

कवि तथा पत्रकार राजु स्याङ्तानले कवितामा तामाङ जातिको इतिहास र संस्कृति आएको बताए । थेबाका कविता एकनासका नभई कुनै बिम्बात्मक र कुनै सीधा रूपमा लेखिएको बताए ।

तामाङ जातिको मात्र नभई मधेस र अन्य पछि पारिएका समुदायको पनि आवाजलाई कवितामा समेट्नु कविको शक्ति भएको स्याङ्तानको भनाइ थियो ।