जनकपुरधाम, फागुन १७ गते । फागुन २१ गते हुने प्रतिनिधिसभा सदस्य निर्वाचनको पुर्व सन्ध्यामा धनुषा निर्वाचन क्षेत्र नं.३ मा चुनावी गतिविधि उच्च बिन्दुमा पुगेको छ । मौन अवधि सुरु एक दिन पुर्व उम्मेदवारहरू घरदैलो, कोणसभा र मतदाता भेटघाट भ्याई नभ्याई तिव्रता दिएका छन् ।
राष्ट्रिय स्वतन्त्र पार्टी (रास्वपा) का उम्मेदवार मनिष झा नेतृत्वको प्रचार प्रसार टोलीले पनि क्षेत्रका मुखियापट्टी मुसहरनिया गाउँपालिका र नगराईन नगरपालिकासहितका विभिन्न बस्तीमा पुगेर आफ्ना एजेन्डा प्रस्तुत गरेका छन् ।
नगराइन नगरपालिका–६ स्थित लगमा पूर्वारी टोलमा आयोजित घरदैलो कार्यक्रममा उनले धनुषा–३ मा वैकल्पिक राजनीतिक सोचप्रति समर्थन बढ्दै गएको दाबी गरे ।
झाले मतदाताले परिणाममुखी र उत्तरदायी नेतृत्व खोजिरहेको उल्लेख गर्दै पुरानै वाचा दोहो¥याउने अभ्यासबाट अब जनता सन्तुष्ट नरहेको बताए । विगतका प्रतिनिधिबाट अपेक्षित विकास र पारदर्शिता नदेखिएको भन्दै उनले नयाँ शैलीको राजनीति आवश्यक भएको धारणा राखेका छन् ।
उनले सडक पूर्वाधार सुधार, कृषिजन्य उत्पादनको बजार सुनिश्चितता, युवाका लागि सीपमूलक तालिम र रोजगारी सृजनालाई प्राथमिकतामा राखेको बताए । सुशासन, पारदर्शिता र जवाफदेहितालाई स्थानीय आवश्यकता अनुसार कार्यान्वयन गर्ने प्रतिबद्धता जनाए ।
घरदैलोका क्रममा नागरिकबाट सुझाव र समर्थन प्राप्त भइरहेको दाबी गर्दै रास्वपाले अभियानलाई थप तीव्र बनाएको जनाएको छ । झाको प्रचार अभियानमा युवाको सक्रिय सहभागिता देखिएको छ भने सामाजिक सञ्जालमार्फत समेत प्रचारप्रसार बढाइएको छ ।
मौन अवधि सुरु हुनुअघि अन्तिम प्रयासमा जुटेका उम्मेदवारहरूको सक्रियतासँगै धनुषा–३ को चुनावी माहोल अझै तातिएको छ । अब मतदाताको निर्णयले नै क्षेत्रको आगामी राजनीतिक दिशा आफ्नो अमूल्य मतले तय गर्नेछ ।
यो विषयमा आफ्नो प्रतिक्रिया दिनुहोस् !