बिराटनगर महानगरपालिका १२ स्थित थापा निवास टोलमा ८ बर्षदेखी अवैध रुपमा राखिएको भारतीय दुतावासको फिल्ड कार्यालय अझै हटाइएको छैन । औचित्य समाप्त भएकोले भारतले कार्यालय हटाउने घोषणा गरेको एक महिना बितिसक्दा पनि अझै कार्यालय बन्द नभएको हो ।
२०७४ मंसिर २३ मा प्रधानमन्त्री केपी ओलीको भारत भ्रमणमा भारतीय प्रधान मन्त्री नरेन्द्र मोदीसँग भएको वान टु वान वार्ता र २०७५ वैशाख २८ मा भारतीय प्रधानमन्त्री नरेन्द्र मोदीको नेपाल भ्रमणपछि भारतले हटाउने जनाएको थियो ।
कार्यालयले आफ्ना गतिविधिहरु नियमित रुपमा गोप्य रुपले गरिरहेको पाइएको छ । फिल्ड कार्यालयका अधिकारी निरज जायसवालले फिल्ड कार्यालय हट्ने/नहट्ने र काम भए/नभएको आदि बारे केही सुचना दिन नसकिने बताए । उनले आवश्यक सुचना चाहिएमा जो कोहीले पनि काठमाण्डौ स्थित दुतावासबाट लिन सक्ने बताए ।
२०६५ भदौ २ मा कोशीमा आएको बाढीले उत्पन्न व्यापारिक समस्यामा सहजीकरण गर्न कार्यालय स्थापना गरिएको थियो । नेपालमा कार्यालय रहने मिति २०१० मै सकिएको थियो । सन २०११ मै नेपाल सरकारले उक्त फिल्ड कार्यालयको औचित्य सकिएको भन्दै हटाउन भारतलाई पत्राचार गरेको थियो । तर पटक पटक नेपालको परराष्ट्र मन्त्रालयले हटाउन पत्राचार गरेपनि फील्ड कार्यालय हटेको छैन ।
२०७५ जेठ २६ मा प्रधानमन्त्री केपी ओलीले एक नम्बर प्रदेश सभालाई सम्वोधन गर्दै आफुले सो कार्यालय हटाउन सफल भएको बताएका थिए । तर उनले गर्वका साथ भनेपनि कार्यालय भने अझै नियमित काममै सक्रिय छ ।
यसरी स्थापना भएको थियो फिल्ड कार्यालय
२०६५ भदौ २ मा कोशी कटान हुँदा तत्काल उद्योग व्यापारमा सहजीकरण गरि आवश्यक सुविधा दिन पुर्वका व्यापारीहरुको आग्रहमा विराटनगरमा भारतीय दुतावासको फिल्ड कार्यालय स्थापना गरिएको थियो । सन २००८ मा पहिले विराटनगरको वरगाछीमा स्थापना भएको कार्यालयको उद्देश्य पुरा भएको भन्दै नेपाल सरकाले सन २०११ मै हटाउन भनेको थियो ।
तात्कालिन परराष्ट्रमन्त्री नाराणकाजी श्रेष्ठले भारतीय दुतावासलाई पत्र लेखेर फिल्ड कार्यालय हटाउन निर्देशन गरेका थिए । तर भारतीय दुतावासले नेपाल सरकारको निर्देशनलाई बेवास्ता गर्दै फिल्ड कार्यालय झन सुविधा सम्पन्न ठाउँमा सारेर संचालन गर्न थालेको थियो । उद्योग संगठन मोरंगको एउटा कोठामा बसेको उक्त्त फिल्ड अफिस पछि बिराटनगरको बरगाछीमा सिङ्गो घर भाडा लिएर बसेको थियो ।
यो विषयमा आफ्नो प्रतिक्रिया दिनुहोस् !