जनकपुरधाम, जेठ २२ गते । देशभरसहित जनकपुरधाममा पनि विश्व वातावरण दिवस मनाइएको छ । बिहीवार नेपाल डेभलपमेन्ट सोसाइटीले विभिन्न संघ संस्थाहरुको सहकार्यमा मनाइएकाे विश्व वातावरण दिवसकाे अवसरमा विद्यार्थीहरूले प्लास्टिक संकलन गरेकाे हो ।
सोसाइटीले जनकपुरधाम उप–महानगरपालिका, ग्रीन स्पेस नेपाल, इन्सेक नेपाल, वोरक लगायत विभिन्न संस्थाहरूसँगको सहकार्यमा सो दिवस मनाएको छ ।
‘बीट द प्लास्टिक च्यालेन्ज’ नामक अभियानबाट सो कार्यक्रमको सुरुवात गरिएको थियो । जसमा २ वटा विद्यालय र १ कलेजका करीब ५० जना विद्यार्थीहरू सहभागी भएका थिए । विद्यार्थीहरूले जनक चोकबाट सुरु गर्दै शिव चोक, राम चोक, गंगानगर तथा केही मन्दिर क्षेत्रहरू हुँदै प्लास्टिक फोहोर संकलन गरेका थिए ।
संकलन गरिएको फोहोर झोलामा राखेर अन्तिम बिन्दु पुनः जनक चोकमै पुगेर कार्यक्रम सम्पन्न गरिएको थियो । जसले सबैभन्दा धेरै तौलको प्लास्टिक फोहोर संकलन गरेको थियो त्यसलाई विजेता घोषणा गरिएको थियो ।
त्यसपछि क्रमशः दोस्रो र तेस्रो स्थान स्थान प्राप्त गरेकालाई प्रथम उपविजेता र द्वितीय उपविजेता घोषणा गरिएको थियो । विजेताहरुलाई ट्रफी र मेडल प्रदान गरिएको थियो ।
कार्यक्रममा विभिन्न संघसंस्था तथा सरोकारवालाहरूको उपस्थिति रहेको थियो भने सो अवसरमा जनकपुरधाम उप–महानगरपालिकासँगको सहकार्यमा तिरहुतिया गाछी क्षेत्रमा वृक्षारोपण कार्यक्रम पनि गरिएको थियो ।
सो कार्यक्रमहरु मार्फत सामूहिक प्रयासले वातावरण संरक्षणप्रति समर्पण देखाएको छ भने प्लास्टिक प्रदूषण अन्त्यतर्फ जान सक्ने एक महत्वपूर्ण कदमको रूपमा लिइएको छ ।
यो विषयमा आफ्नो प्रतिक्रिया दिनुहोस् !