जनकपुरधाम, जेठ ३० गते । सरकारद्वारा सुन र सुनकाे गहनामा लगाएको विलासिता करको विरोधमा जनकपुरधामका सुनचाँदी व्यवसायीहरु आन्दोलित भएका छन् ।
नेपाल सुनचाँदी व्यवसायी संघ धनुषा र जनकपुरधाम सुनचाँदी व्यवसायी संघको अगुवाइमा उनीहरुले नगरपरिक्रमा सहितको विरोध प्रदर्शन गर्दै आ–आफ्ना पसलको साँचो जिल्ला प्रशासन कार्यालय धनुषामा बुझाएर बिरोध जनाएका छन् ।
नेपाल सुनचाँदी व्यवसायी संघ धनुषाका अध्यक्ष दीपेन्द्र ठाकुरले सरकारको निर्णय नसच्याएसम्म व्यवसाय बन्द राख्ने कार्यक्रम रहेको जनाउँदै भने, ‘विलासिता कर र गरगहनामा लगाइएको मूल्य अभिवृद्धि कर (भ्याट) फिर्ता नभएसम्म हामी आन्दोलनमा रहनेछौं ।’
जनकपुरधाम सुनचाँदी व्यवसायी संघका अध्यक्ष पवन ठाकुरले समेत सरकारको कर प्रणालीप्रति आपत्ति जनाउँदै भने, ‘सुनलाई कानूनी रूपमा चल सम्पत्ति मानेको अवस्थामा त्यसमा विलासिता कर लगाउनुको कुनै औचित्य छैन। यो कर व्यवसायीमाथि उठीवास गराउने प्रकृतिको छ ।’
व्यवसायीहरुले विलासिता कर तत्काल हटाउनुपर्ने, हिरा र जवाहरातमा लगाइएको भ्याट पुनर्विचार गर्नुपर्ने, र भन्सार शुल्क ६ प्रतिशत कायम गरिनुपर्ने माग अघि सारेका छन् । यी मागहरु सहित अहिले देशभरका सुनचाँदी व्यवसायीहरु आन्दोलनमा उत्रिएका छन् ।
सुनचाँदी व्यवसायीहरू सरकारको नयाँ कर नीतिले आफ्नो व्यवसाय नै सङ्कटमा पारेको भन्दै आन्दोलनमा उत्रिएका हुन् । उनीहरूका अनुसार; यो कर लागू भएपछि सुनचाँदीको मूल्य बढ्नेछ । उपभोक्ताले खरिद नगर्दा व्यवसायिक वातावरण नै गुम्ने भएकाले आफूहरू आन्दोलनमा उत्रिएको उनीहरूको भनाइ छ ।
बैङ्कले बेच्दा नै कर लगाउने, थोक व्यापारीले खुद्रा बिक्रेतालाई बेच्दा मूल्य बढाउने र खुद्रा बिक्रेताले उपभोक्तालाई बेच्दा सुनचाँदीको मूल्य थप बढ्ने जनकपुरधाम सुनचांदी व्यवसायी संघका अध्यक्ष पवन ठमकुरले बताए ।
उनका अनुसार ‘यो २ प्रतिशत त ६ प्रतिशत हुन हुन्छ । त्यसमाथि १३ प्रतिशत भ्याट छ । त्यही हिसाबले हामीकहाँ सुन तोलामै ४० हजार रुपैयाँ बढ्न सक्ने सम्भावना देख्छु’, शाक्यले भने, ‘तीन तह गरेर ६ प्रतिशत भयो, अनि १३ प्रतिशत भ्याट गरेर १९ प्रतिशत ! १० प्रतिशत भन्सार कर लाग्छ भनेपछि २९ प्रतिशत भयो । केही नभए पनि ६० हजार रुपैयाँ मूल्यवृद्धि हुने देखिन्छ । ।’
यो विषयमा आफ्नो प्रतिक्रिया दिनुहोस् !