जनकपुरधाम, मंसिर ५ गते । तराई मधेशकाे लाईफलाईन भनिने सिरहा र धनुषा जिल्ला जाेडने हुलाकी राजमार्ग अन्तर्गत रहेकाे १४ वर्षिदेखि निर्माणाधिन कमला पुलकाे निर्माण कार्य नयां टेण्डर प्रक्रियाबाट अघि बढाइने भएकाे छ ।
विशेष कामले जेनजी समुहका सुदन गुरूंगसंगै धनुषा आएका ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले कमला पुलकाे स्थलगत अनुगमनकाे क्रममा उनले यस्ताे बताएका हुन् ।
अनुगमनकाे क्रममा संचारकर्मीहरूकाे जिज्ञासा मन्त्री घिसिङले भने पहिला हामी प्राविधिकसहितकाे कार्यदलबाट निरिक्षण गराउने छाैं । त्यसकाे प्रतिवेदनकाे आधारमा पुरानैलाई मरम्मत गरेर काम चल्नेवाला हुन्छ भने मरम्मत सम्भार गराउने छाै, सरकारसंग बजेटकाे आभाव छैन हामी नयां टेण्डर प्रक्रियाबाट निर्माण गराउनेछाै ।
निर्माण कार्यकाे करिब १४ वर्ष पुग्दासमेत पुल निर्माण हुन नसकेको, पुल नबन्दा नागरिकले सास्ती खेप्नु परेको गुनासो आएपछि मन्त्री घिसिङले समस्या समाधानका लागि पुलको निर्माणको अनुगमन गरेका हुन ।
सो क्रममा मन्त्री घिसिङले उक्त पुल समग्र मधेश क्षेत्रको विकासको लागि अत्यन्तै महत्वपूर्ण रहेकोले तिब्र गतिमा निर्माण कार्य अगाडी बढाईने प्रतिबद्धता जनाए ।
विगतमा पुल निर्माणमा भएका अनियमितताको बारे राखिएकाे जिज्ञासामा उनले सम्बन्धित निकायले छानविन गरिरहेको छ, दोषी देखिएकालाई कानुन बमोजिम कार्वाही गरिनेछ भने ।
हुलाकी राजमार्गमा पर्ने कमला पुल निर्माणकै क्रममा १७ असार २०७८ मा कमला नदीमा आएको बाढीले दुईवटा पिलर भासिएर ४ वटा स्लावमा क्षति पुगेको थियो । क्षति पुगेका स्लावमध्ये २ वटा हटाइएको छ भने २ वटा हटाउन बाँकी रहेकाे छ ।
विज्ञबाट उक्त क्षेत्रको माटो परीक्षण गरी परिमार्जित नयां डिजाइन तयार गरी स्वीकृत गरिसकिएकाे छ । तर बजेट आभाव र पुरानाे ठेकेदारकाे इन्स्याेरेन्स विवादले गर्दा अहिलेसम्म निर्माण कार्य अघि बढाइएकाे छैन ।
साे अनुगमन टाेलीमा मन्त्री घिसिङसंगै युवा तथा खेलकुद मन्त्री बब्लु गुप्ता, भौतिक पूर्वाधार तथा यातायात मन्त्रालयका सचिव केशव कुमार शर्मा, सडक विभागका महानिर्देशक विजय जैशीलगायत लगायतका व्यक्तिहरूकाे सहभागिता रहेकाे थियाे ।
वि.सं. २०६८ को जेठमा २४ करोड ९१ लाख (भ्याटसहित) २०७१ काे मंसिरसम्म निर्माण गर्ने गरी पप्पु लुम्बिनी जेभीसँग ठेक्का सम्झौता सम्झौता भएको थियो । तोकिएको समयमा पुल निर्माण हुन नसकेपछि आठौं पठक थपिएको ठेक्का सम्झौताको म्याद गत असारमा सकिएको थियो ।
हालसम्म २० करोड ४३ लाख (भ्याट) सहित भुक्तानी भइसकेको छ । पुल निर्माणको भौतिक प्रगति र वित्तीय प्रगति क्रमश: ८३ र ८२ प्रतिशत रहेको छ । १२ वटा स्पान भएको पुलको लम्बाइ ४६९ मिटर रहेको छ । पुल निर्माणसँगै नदीको दुवै किनारतर्फ १३०० मिटर नदी नियन्त्रण र २०० मि. पहुँच सडक निर्माण गर्नुपर्ने छ ।
वि.सं. २०७८ असार १७ मा कमला नदीमा आएको बाढीले पुलको दुईवटा जग भासिएर ४ वटा स्लावमा क्षति पुगेको थियो ।
यो विषयमा आफ्नो प्रतिक्रिया दिनुहोस् !