जनकपुरधाम । भारतको बिहारस्थित रक्सौलदेखि नेपालको राजधानी काठमाडौं जोड्ने विद्युतीय ब्रोडगेज रेलमार्ग परियोजनाको तयारी तीव्र पारिएको छ।
करिब १३६ किलोमिटर लामो प्रस्तावित रेलमार्ग निर्माण भए भारत र नेपालबीच रेलमार्फत आवागमन सहज हुनुका साथै व्यापार, पर्यटन र पारवहनमा नयाँ सम्भावना खुल्ने अपेक्षा गरिएको छ।
भारतीय सञ्चार माध्यमहरूमा प्रकाशित समाचार अनुसार प्रस्तावित रेलमार्ग रक्सौलबाट सुरु भएर वीरगञ्ज हुँदै निजगढ तथा पहाडी क्षेत्र पार गरी काठमाडौंको चोभारसम्म पुग्नेछ।
रेलमार्गमा रेलको गति अधिकतम १२० किलोमिटर प्रतिघण्टा हुने प्रस्ताव छ। हाल सडकमार्गबाट रक्सौलदेखि काठमाडौं पुग्न ६ देखि ८ घण्टा लाग्ने यात्रा रेल सञ्चालनमा आएपछि करिब साढे २ घण्टामा पूरा गर्न सकिने दाबी गरिएको छ।
परियोजनाको भौगोलिक बनावट चुनौतीपूर्ण रहेकाले कुल रेलमार्गमध्ये करिब ४२ किलोमिटर सुरुङ निर्माण गर्नुपर्नेछ। यो कुल दूरीको झण्डै ३० प्रतिशत हो। त्यस्तै, नदी तथा खोँच पार गर्न १२४ वटा ठूला पुल निर्माण गर्ने प्रस्ताव गरिएको छ।
भारतीय सञ्चार माध्यम एनडिटीवी इण्डियामा प्रकाशित समाचार अनुसार प्रस्तावित रेलमार्ग रक्सौल, वीरगञ्ज, मनहरवा, सपहर बजार, जीतपुर, निजगढ, धियाल, शिखरपुर, सिस्नेरी, सतीखेल, खोकना हुँदै चोभारसम्म पुग्ने उल्लेख छ। यसले सीमावर्ती क्षेत्रदेखि काठमाडौं उपत्यकासम्म यात्रु तथा मालसामान ढुवानीलाई सहज बनाउन सक्ने सम्भावना छ।
रेलमार्गको अन्तिम प्राविधिक सर्वेक्षण तथा विस्तृत परियोजना प्रतिवेदन (डीपीआर) तयार भइसकेको समाचारमा उल्लेख छ। परियोजनाको प्राविधिक अध्ययन तथा सर्वेक्षणको जिम्मेवारी कोंकण रेलवेले पाएको छ भने सर्वेक्षणका लागि ४१ करोड रुपैयाँ बजेट जारी गरिएको बताइएको छ।
यस रेल परियोजनामा २५ देखि ३० हजार करोड रुपैयाँसम्म लगानी लाग्ने अनुमान गरिएको छ। निर्माण सम्पन्न भएपछि नेपाललाई भारतीय रेल सञ्जालमार्फत उत्तर भारत, दिल्ली तथा अन्य प्रमुख व्यापारिक केन्द्रसँग जोड्न सहयोग पुग्नेछ। साथै, समुद्री बन्दरगाहसम्मको पहुँच सहज भई नेपालको आयात–निर्यात लागत घटाउने सम्भावना पनि देखिएको छ।
रक्सौल–काठमाडौं रेलमार्ग नेपालका लागि केवल यातायात परियोजना मात्र नभई क्षेत्रीय व्यापार, पर्यटन, औद्योगिक विकास र आर्थिक सहकार्यको नयाँ आधार बन्न सक्ने अपेक्षा गरिएको छ।

















यो विषयमा आफ्नो प्रतिक्रिया दिनुहोस् !