जनकपुरधाम, फागुन १८ गते । धनुषा क्षेत्र नम्बर ३ मा यसपटकको प्रतिनिधिसभा सदस्य निर्वाचन रोचक मोडमा पुगेको छ ।
पुराना दलहरूबीचको प्रतिस्पर्धाभन्दा फरक, परिवर्तनको एजेन्डा अघि सारेको राष्ट्रिय स्वतन्त्र पार्टी (रास्वपा) प्रति मतदाताको आकर्षण बढ्दै गएको देखिएको छ। विशेषगरी मध्यम तथा तल्लो वर्गका मतदातामा रास्वपाप्रति सकारात्मक देखिन्छ ।
लामो समयदेखि पुराना दलहरू सत्ता आलोपालो गर्दै आएकले विकासको अपेक्षाअनुसार उपलब्धि नभएको र भ्रष्टाचार मौलाएको भन्ने गुनासो स्थानीयस्तरमा व्यापक छ।
सिटी रिक्सा चालक, दैनिक ज्यालादारी मजदूर, साना तथा मध्यम व्यवसायी, कर्मचारी र दलित समुदायका मतदातामा रास्वपाको चुनाव चिह्न ‘घण्टी’प्रति आकर्षण देखिएको छ। कतिपय मतदाताले उम्मेदवारको व्यक्तिगत छविभन्दा पनि तत्कालिन काठमाडौं महानगरपालिकाका प्रमुख बालेन शाह को कार्यशैलीबाट प्रभावित भएर रास्वपालाई समर्थन गर्ने धारणा व्यक्त गरेका छन्।
जनकपुरधाम–४ का मतदाता रामकृपाल मुखियाले विगतका सरकारप्रति असन्तुष्टि व्यक्त गर्दै भने, “वर्षौंसम्म कांग्रेस, एमाले र माओवादीले सरकार चलाए। हामीले तिरेको कर विकासमा खर्च हुनुपर्ने हो, तर भ्रष्टाचारमै सीमित भयो।”
उनले अब इमान्दार र नयाँ नेतृत्वलाई अवसर दिनुपर्ने समय आएको बताए। उनका अनुसार, “नयाँ पुस्तालाई अवसर नदिए परिवर्तन सम्भव हुँदैन।”
धनौजीका रामईश्वर मण्डलले पनि विगतमा पटक–पटक निर्वाचित भएका नेताहरूले क्षेत्रको आधारभूत समस्या समाधान नगरेको आरोप लगाए। “गाउँसम्म पुग्ने बाटोसमेत छैन। वर्षायाममा त जनकपुरधामबाट हाम्रो गाउँ आउने सडक नै अवरुद्ध हुन्छ,” उनले भने।
बेरोजगारी समस्या झन् बढ्दै गएको भन्दै उनले यसपटक पुराना अनुहारभन्दा नयाँ र इमान्दार छविका उम्मेदवार रोज्ने बताए।
त्यस्तै, मुखियापट्टी मुसहरनियाका देवेन्द्र यादवले पनि पुराना दलहरूप्रति निराशा व्यक्त गर्दै रास्वपालाई अवसर दिनुपर्ने धारणा राखे। उनका अनुसार, “हामीले जिताए पनि सरकार उही पुरानै अनुहारले चलाउने हो भने परिवर्तन कसरी हुन्छ ?” उनले मधेशबाटै उठेका नयाँ नेतृत्वलाई समर्थन गर्नुपर्ने बताए।
धनुषा–३ मा रास्वपाका उम्मेदवार मनिष झाले आफू अरू दलजस्तै अवास्तविक आश्वासन बाँड्ने पक्षमा नरहेको दाबी गरेका छन्।
“म मत माग्न सपना बाँड्दिनँ, काम गर्ने प्रतिबद्धता जनाउँछु,” उनले भने। उनी भन्छन, पहिलो प्राथमिकता भ्रष्टाचार अन्त्य र सुशासन स्थापना हुनेछ।
झाले दलित तथा विपन्न वर्गका लागि स्वरोजगार कार्यक्रम ल्याउने, धार्मिक तथा सांस्कृतिक सम्पदाको संरक्षणमा पहल गर्ने योजना रहेका बताउंछन् ।
यसका साथै जानकी मन्दिर लाई विश्व सम्पदा सूचीमा सूचीकृत गराउने पहल गर्ने उनको प्रतिबद्धता छ। साथै, क्षेत्रीय खेलकुद प्रवर्द्धनका लागि ‘रामजानकी स्टेडियम’ निर्माण, सडक सञ्जाल विस्तार, गुणस्तरीय शिक्षाका लागि पूर्वाधार विकास तथा अस्पताल स्तरोन्नति र नयाँ स्वास्थ्य संस्था स्थापना गर्ने एजेन्डा उनले अघि सारेका छन् ।
बेरोजगारी न्यूनीकरणका लागि सीपमूलक तालिम र स्थानीय उत्पादनमा आधारित स्वरोजगार कार्यक्रम सञ्चालन गर्ने उनको योजना छ। “युवा विदेश पलायन रोक्न स्थानीयमै अवसर सिर्जना गर्नुपर्छ,” उनले भने ।
निर्वाचनमा नयाँ समीकरण
धनुषा–३ मा यसपटकको प्रतिस्पर्धा परम्परागत दल र नयाँ शक्तिबीचको परीक्षणका रूपमा हेरिएको छ। कांग्रेसभित्रको आन्तरिक विवाद, एमालेतर्फको सामाजिक समीकरण र विगतको विकासप्रति असन्तुष्ट मतदाताको झुकावले चुनावी समीकरण परिवर्तन हुन सक्ने आकलन गरिएको छ।
विश्लेषकहरूका अनुसार, यदि मध्यम तथा तल्लो वर्गका मतदाताको समर्थन मतदानमा परिणत भयो भने रास्वपाले अपेक्षाकृत मत ल्याउन सक्ने सम्भावना छ। यद्यपि, संगठनात्मक संरचना कमजोर हुनु र ग्रामीण तहसम्म संगठन विस्तार नहुनु चुनौतीका रूपमा रहेको छ।
यसपटक धनुषा–३ मा मतदाताले पुराना दललाई निरन्तरता दिने कि परिवर्तनको नारा बोकेको नयाँ शक्तिलाई अवसर दिने भन्ने प्रश्न नै निर्वाचनको मूल केन्द्रबिन्दु बनेको हाे ।
यो विषयमा आफ्नो प्रतिक्रिया दिनुहोस् !