जनकपुरधाम, साउन २५ गते । नेपालमा मानिसको मासु बेच्नेलाई कारवाही के गर्ने भन्ने कानून आभावमा पक्राउ परेका मानिसको मासु बेच्नेलाई कारवाही गर्ने कानून नरहेको कारण कारवाही प्रक्रियामा अन्यौलता उत्पन्न भएको छ ।
काठमाडौको पशुपति आर्यघाटमा दाहसंस्कारका लागि राखिएको शवको हड्डी र मासु बिक्री गरेको आरोपमा पक्राउ परेकालाई कारवाही के गर्ने भन्ने कानून आभावमा प्रहरी औन्यलमा परेको छ । मानिसको मासु र हड्डी बेच्ने आरोपमा गणेश ढकाल र उनका एक सहयोगी पक्राउ परेको हो ।
महानगरीय प्रहरी वृत्त, गौशालाले काभ्रेका स्थायी निवासी रामबहादुर शाहीको शवलाई शुक्रबार आर्यघाटमा जलिरहेको शव निकालेर त्यसको हड्डी र मासु काटेर बिक्री गरिरहेको आरोपमा तिनीहरुलाई पक्राउ गरिएको जनाएको छ ।
मानव शवको अंग चोरी वा बिक्री गर्ने विषयमा नेपालको कानुनमा स्पष्ट व्यवस्था नभएकाले प्रहरीलाई कारबाही अघि बढाउन कानुनी जटिलता देखिएको छ । कानून आभावमा अन्यौलता देखिएपछि यस्तो गम्भीर अपराधमा पनि प्रहरीले उनीहरूविरुद्ध ‘अभद्र व्यवहार’ सम्बन्धी कसुरमा मुद्दा चलाइएको छ । यस कार्यका लागि विशेष कानुनको अभावमा यस्तो बाटो अपनाउनु परेको प्रहरीको भनाइ छ ।
मृतकका परिवारजनले नै आरोपीहरूलाई रंगेहात पक्राउ गरी प्रहरीलाई खबर गरेका थिए। प्रहरीका अनुसार, घाटमा शव जलाउने काम गर्ने ढकालले आफ्ना सहयोगीलाई शाहीको जलिरहेको शवबाट निकालिएको मासु र हड्डी प्याक गर्न लगाइरहेको अवस्थामा मृतकका आफन्तले देखेका थिए ।
सोही क्रममा मृतकका परिवार र आरोपीहरूबीच विवाद र भनाभन भएको थियो । तत्कालै परिवारले गौशाला प्रहरीलाई घटनाबारे जानकारी गराएपछि प्रहरी टोली घटनास्थल पुगेको थियो । पछि, मृतकका परिवारले आरोपीहरूविरुद्ध औपचारिक जाहेरी दिएका थिए । गौशाला प्रहरी वृत्तका सूचना अधिकारी, प्रहरी नायब निरीक्षक सुकदेव खनालका अनुसार घटना अत्यन्तै संवेदनशील र पहिलो पटक सुनिएको प्रकृतिको छ ।
उनले भने, ‘शुक्रबार ढकालले सहयोगीलाई मासु र हड्डी प्याक गर्न लगाइरहेको देखेपछि परिवारजनले हामीलाई खबर गर्नुभयो। उजुरीपछि हामीले दुवै जनालाई पक्राउ गरी अनुसन्धान सुरू गरेका छौँ । उनीहरूले उक्त मासु र हड्डी कसलाई र के प्रयोजनका लागि निकालेको भन्नेबारेमा अनुसन्धान भइरहेको छ ।’
प्रारम्भिक अनुसन्धानका अनुसार, ढकालले शवबाट निकालिएको हड्डी र मासु ५०० रुपैयाँमा बेच्ने योजना बनाएका थिए । सो रकममध्ये ४०० रुपैयाँ आफूले राख्ने र १०० रुपैयाँ सहयोगी मैनाली थरका व्यक्तिलाई दिने सहमति भएको खुलेको खनालले जानकारी दिए । ‘यो उनीहरूको पहिलो प्रयास हो वा यसअघि पनि यस्ता गतिविधिमा संलग्न थिए भन्नेबारे गहिरो अनुसन्धान गरिरहेका छौँ’, खनालले भने ।
यो विषयमा आफ्नो प्रतिक्रिया दिनुहोस् !