जनकपुरधाम, असार २१ गते । महोत्तरीको मटिहानी नगरपालिकाका १६० जनालाई जग्गाको लालपूर्जा वितरण गरिएको छ ।
नगरपालिकाको वडा नम्बर ४ मझौरा विसनपुरको गाउँ ब्लकको जग्गामा वर्षौदेखि बस्दै आएका १६० घर परिवारलाई जग्गा धनीको लालपूर्जा वितरण गरिएको हो । नापी कार्यालय महोत्तरी जलेश्वर १ नम्बर नापी टोली द्वारा नेपाल राष्ट्रिय जनता माध्यमिक विद्यालयमा वडा नम्बर ४ मा आयोजित एक कार्यक्रमका बीच मटिहानी नगरपालिकाका मेयर हरि मण्डलले जग्गाको लालपूर्जा वितरण गरेका हुन् ।
मटिहानी नगरपालिका ४ का वडाध्यक्ष अब्दुल गफारको अध्यक्षतामा सम्पन्न कार्यक्रममा नापी कार्यालय महोत्तरीको प्रमुख राम विनय कुमार सिंह, १ नं. टोली प्रमुख नवल किशोर यादव, मटिहानी नगरपालिकाका वड़ा सदस्यहरु लगायत नापी कार्यालयका कर्मचारीहरूको उपस्थिति रहेको थियो ।
वर्षौदेखि गाउँ ब्लकको जग्गामा बस्दै आएका विपन्न परिवारहरु धनी पुर्जा पाएपछि निकै उत्साहित देखिएका छन् । उनीहरु भन्छन् मेयर मण्डलको प्रयासले आफूहरु स्थायी रुपमा घरको छानाका लागि जग्गा पाएका छौं । नत्र २४ सौं घण्टा मनमा एउटा त्रास थियो, सरकारले आफूलाई यस जग्गाबाट उठिबास नगराई देओस । तर मेयरज्यूको पहलले आफूहरु अब आफ्नो जग्गा भयो भन्नेमा ढुक्क भएको छु ।
यो विषयमा आफ्नो प्रतिक्रिया दिनुहोस् !