जनकपुरधाम । धनुषाको ढल्केवरका लागि प्रस्तावित ट्रमा सेन्टर योजना अन्यत्रै सारिएको विराेधमा मधेश प्रदेशका पुर्व उर्जा, सिचाई तथा खानेपानी मन्त्री शेषनारायण यादव धर्नामा बस्ने भएकाे छ ।
शुक्रवार बिहान १० बजेदेखि स्थानीय, नागरिक समाजका अगुवा र बुद्धिजीवीकाे सहभागितामा धर्नामा बस्ने उनले जनाएकाे छ । सरकारलाई दबाव दिन धर्ना कार्यक्रमलाइ सशक्त बनाउन स्थानीय सबैलाई सहयाेग गर्न अनुराेध गरेका छन् ।
प्रदेश सांसद समेत रहेकाे यादवले ढल्केवरका लागि प्रस्तावित ट्रमा सेन्टर याेजना ढल्केवरमै फिर्ता नआएसम्म धर्ना जारी रहने जनाए ।
मंगलबार प्रतिनिधिसभा बैठकमा स्वास्थ्यमन्त्री निशा मेहताले मधेश प्रदेशको लहानमा ट्रमा सेन्टर बन्ने बताएपछि ढल्केवरमा साेही दिनदेखि स्थानीय समेत आन्दाेलित भएका छन् ।
हाल मिथिला नगरपालिका–७, साविकको ढल्केवर गाविस वडा नं २‘क’ को कित्ता नं १६९ को चार विघा क्षेत्रफल रहेको ऐलानी जग्गामा दुई दशक अघि नै ट्रमा सेन्टर प्रस्ताव गरिएकाे थियाे ।
संघिय सरकारले साे प्रस्ताव अन्तर्गत आर्थिक वर्ष २०७८/०७९ को बजेटमा ट्रमा सेन्टर निर्माण गर्ने शीर्षकमा पहिलो पटक रकम विनियोजन गरेको थियो ।
उक्त योजनाका लागि जग्गा प्राप्तिको प्रक्रिया पनि पूरा भइसकेर लालपूर्जा समेत बनेर शिलान्यासको प्रक्रियामा रहेको उक्त योजना स्वास्थ्य मन्त्रीले लहान लग्न खाेजेकाे उनले आराेप लगाए ।
स्थानीय जनप्रतिनिधिसमेतको उपस्थितीमा बुधबार साँझदेखि स्थानीयहरुले पूर्वपश्चिम राजमार्ग अवरुद्ध गरी प्रदर्शन गर्दै आइरहेका छन् ।
यता ट्रमा सेन्टरकै विषयमा बुधबार बसेको सर्वपक्षीय बैठकले मिथिलाका मेयर महेन्द्र महतोको संयोजकत्वमा संघर्ष समिति गठन गरिएको छ । उक्त समितिमा नेपाली कांग्रेस, नेकपा एमाले, नेकपा, राप्रपा, उद्योग वाणिज्य संघ, युवा, वुद्धिजीविततर्फका प्रतिनिधिहरूकाे सहभागिता रहेकाे छ ।
यो विषयमा आफ्नो प्रतिक्रिया दिनुहोस् !