जनकपुरधाम, असार १६ गते । नेपाली कांग्रेसका नेताहरुले राजर्षि जनक विश्वविद्यालयको भवन निर्माण प्रक्रिया अघि बढाउन माग गरेको छ ।
विश्वविद्यालयका उपकुलपतिलाई नेपाली काँग्रेस धनुषाका सभापति योगेन्द्र पंजियारको नेतृत्वमा एक प्रतिनिधिमण्डलले भेटी औपचारिक स्मरणपत्र बुझाएका हुन् । स्मरणपत्र बुझ्दै विश्वविद्यालयका उपकुलपति (भीसी) ले राजनीतिक दबाबका कारण भवन निर्माण प्रक्रिया अघि नबढेको जानकारी गराएका छन् ।
उनले सबै प्रक्रिया पूरा भए पनि निर्माणमा अवरोध राजनीतिक हस्तक्षेपबाट उत्पन्न भएको स्वीकार गरे । यद्यपि, त्यो दबाब कुन पार्टी वा नेताबाट आएको हो भन्ने खुलासा गर्न उनले चाहेनन् ।
उनले भने, “हामीमाथि दबाब आवश्यक छ । यस्तो दबाबले हामीलाई बल दिन्छ । अहिले विश्वविद्यालयको सबै भौतिक संरचना भाडा र लिजमा सञ्चालन भइरहेको छ, जुन दीर्घकालीन समाधान होइन । सबैको चाहना आफ्नो भवन होस् भन्ने हो ।”
वि.सं. २०५३ सालमा नेता विमलेन्द्र निधिले राजर्षि जनक विश्वविद्यालयको अवधारणा प्रस्ताव गरेका थिए । त्यसबेला तत्कालीन जिल्ला विकास समिति सभापति राम सरोज यादवको अध्यक्षतामा परिषद् बैठकबाट निर्णय पारित गरिएको थियो । त्यस निर्णयअनुसार धनुषाका सबै तत्कालीन गाविसले १ लाखका दरले र महोत्तरीका सबै स्थानीय निकायले ५० हजारका दरले आर्थिक सहयोग गरेका थिए ।
हाल विश्वविद्यालयलाई नगराईन नगरपालिका–४ फुलगामास्थित मणियारी चौरीमा करिब १३ बिघा जग्गा उपलब्ध गराइएको भए पनि तीन दशक बितिसक्दा पनि भवन निर्माण हुन नसक्नु चिन्ताको विषय बनेको छ ।
प्रतिनिधिमण्डलमा पूर्व प्रदेश मन्त्री तथा प्रदेशसभा सदस्य राम सरोज यादव, जनकपुरधाम उपमहानगरपालिकाका मेयर मनोज कुमार साह, नगराईन नगरपालिकाका मेयर बिनय यादव, काँग्रेसका युवा नेता राम पल्टन साह विद्यार्थी नेता सुजित यादवलगायत नेताहरूको बाक्लो उपस्थिति रहेको थियो ।
यो विषयमा आफ्नो प्रतिक्रिया दिनुहोस् !