जनकपुरधाम, पुस २७ गते । मधेश प्रदेश सरकारको प्रवक्ताको जिम्मेवारी स्वास्थ्य तथा जनसंख्या मन्त्री जंगीलाल रायलाई दिइएको छ।
जनकपुरधामस्थित मुख्यमन्त्री तथा मन्त्रिपरिषद् कार्यालयमा सोमबार बसेको मन्त्रिपरिषद् बैठकले मन्त्री रायलाई सरकारको आधिकारिक प्रवक्ता तोक्ने निर्णय गरेको हो।
बैठकले प्रदेशस्तरमा देखिएका राजनीतिक, प्रशासनिक, कानुनी तथा आर्थिक–सामाजिक समस्याको अध्ययन र समाधानका लागि तीनवटा उच्चस्तरीय समिति गठन गर्ने निर्णय समेत गरेको छ। प्रत्येक समिति तीन सदस्यीय रहने जनाइएको छ।
राजनीति तथा प्रशासनसम्बन्धी समस्याको अध्ययनका लागि गठन गरिएको समितिको संयोजकमा भूमि व्यवस्था, कृषि तथा सहकारी मन्त्री श्याम पटेललाई जिम्मेवारी दिइएको छ। समितिका सदस्यमा खेलकुद तथा समाज कल्याण मन्त्री वसन्त कुशवाह र उद्योग, वाणिज्य तथा पर्यटन मन्त्री कनिश पटेल रहेका छन्।
त्यस्तै, कानुन, न्याय तथा मामिला समितिको संयोजकमा श्रम तथा यातायात मन्त्री मनिष सुमनलाई तोकिएको छ। यस समितिमा गृह, सञ्चार तथा कानून मन्त्री फकिरा महतो र वन तथा वातावरण मन्त्री शंकर प्रसाद चौधरी सदस्य रहेका छन्।
आर्थिक तथा सामाजिक समितिको संयोजकको जिम्मेवारी अर्थमन्त्री महेश यादवलाई दिइएको छ। समितिका सदस्यमा भौतिक पूर्वाधार विकास मन्त्री राजकुमार गुप्ता र शिक्षा तथा संस्कृति मन्त्री रानी शर्मा रहेका छन्।
प्रदेश सरकारले यी समितिहरूमार्फत प्रदेशस्तरका समस्या पहिचान, आपसी समन्वय र प्रभावकारी समाधानमा सहयोग पुग्ने अपेक्षा गरेको जनाएको छ।
यो विषयमा आफ्नो प्रतिक्रिया दिनुहोस् !