जनकपुरधाम, माघ ९ गते । ठगी तथा विश्वासघातको आरोपमा धनुषा प्रहरीले जनकपुरधामबाट दुई जनालाई पक्राउ गरेको छ।
जिल्ला अदालत धनुषाले जारी गरेको पक्राउ पूर्जीका आधारमा उपमहानगरपालिका ५ का राजेश प्रसाद साह र दिपक साह ‘मिन्टु’ लाई प्रहरीले पक्राउ गरेको हो।
जिल्ला प्रहरी कार्यालय धनुषाका प्रहरी नायव उपरीक्षक गणेशबहादुर बमले दिएकाे जानकारी अनुसार उनीहरूविरुद्ध ठगी तथा विश्वासघात सम्बन्धी मुद्दा दर्ताकाे आधारमा पक्राउ गरिएको हाे सोही मुद्दामा बृजनन्दन प्रसाद साह र मन्जु देवीविरुद्ध पनि पक्राउ पूर्जी जारी भइसकेको र उनीहरूको खोजी कार्य जारी रहेको प्रहरीले जनाएको छ।
उक्त मुद्दा जनकपुरधाम–५ निवासी विजय साहले दायर गरेका हुन्। पीडित साह करिब २० वर्षसम्म अमेरिकामा बसोबास गर्दै आएका थिए। उक्त अवधिमा उनले आफ्ना ससुरा–सासु तथा सालो नाता पर्ने व्यक्तिहरूमाथि विश्वास गरी धनुषा जिल्लाका विभिन्न कित्ता नम्बरका जग्गा खरिद तथा घर निर्माणका लागि रकम र सम्पत्ति आफ्नै नामबाट पठाएको प्रहरीको भनाइ छ।
पीडितका अनुसार ती जग्गा तथा सम्पत्ति ससुरा बृजनन्दन प्रसाद साह, सासु मन्जु देवी र सालोहरू राजेश प्रसाद साह तथा दिपक साहको नाममा राखिएको थियो। तर पारिवारिक सम्बन्ध बिग्रिएपछि जब आफूले आफ्नो जग्गा र नगद फिर्ता मागे, उनीहरूले फिर्ता दिन अस्वीकार गरेपछि आफू ठगीमा परेको थाहा पाएको साहले बताएका छन्।
न्याय नपाएपछि साह अदालतको शरणमा पुगेका थिए, जसको आधारमा प्रहरीले अनुसन्धान अघि बढाउँदै हाल दुई जनालाई पक्राउ गरेको हो । घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ।
यो विषयमा आफ्नो प्रतिक्रिया दिनुहोस् !