जनकपुरधाम । मधेश प्रदेशको गाैरवकाे आयाेजना रहेकाे दुधमति नदी उत्खनन तथा विकास कार्य औपचारिक रूपमा सुरु गरिएको छ।
मधेश प्रदेश सरकारको ऊर्जा, सिँचाइ तथा खानेपानी मन्त्रालयअन्तर्गत सञ्चालन भइरहेको दुधमति नदी उकास विकास कार्यक्रम अन्तर्गत शनिबार एक कार्यक्रमका बीच नदी उत्खनन, सौन्दर्यकरण तथा सिँचाइसम्बन्धी कार्यको शुभारम्भ गरिएको हो ।
नेपाली कांग्रेसका नेता एवं पूर्वमन्त्री शेषनारायण यादवको उपस्थितिमा पूजापाठसहित उक्त कार्यको शुभारम्भ गरिएको हो। यादवले मन्त्रीको जिम्मेवारीमा रहँदा दुधमति नदीको दीर्घकालीन सौन्दर्यकरण र विकासका लागि पहल थालेका थिए। सोही प्रयासको निरन्तरतास्वरूप प्रदेशकै गौरवको आयोजनाका रूपमा यस योजनालाई अघि बढाइएको हो ।
हालको चालु आर्थिक वर्षमा प्रदेश सरकार र संघीय सरकारको सहकार्यमा बहुवर्षीय योजनाअन्तर्गत बजेट विनियोजन गरिएको छ। पहिलो चरणमा करिब ११ करोड रुपैयाँभन्दा बढी लागतमा धनुषाको महेन्द्रनगरदेखि महोत्तरीको मटिहानीसम्मको नदी बहाव क्षेत्रमा माटो उत्खनन कार्य गरिनेछ।
उत्खनन कार्यको ठेक्का काठमाडौँस्थित बछालदेवी जेभी ले प्राप्त गरेको छ। ठेक्का सम्झौता अनुसार कम्पनीले एक वर्षभित्र कार्य सम्पन्न गर्ने लक्ष्य राखिएको छ।
कार्य शुभारम्भ कार्यक्रममा कांग्रेस सभापति याेगी पजियार, वडाध्यक्ष जीवछ यादव, कांग्रेस नेता माेहन माथेमा र क्षिरेश्वर नगरपालिकाका उपमेयर रचना श्रेष्ठ, दुधमति विकास समितिका पदाधिकारीहरू, सम्बन्धित मन्त्रालयका कर्मचारीहरू तथा नेपाली कांग्रेसका नेता–कार्यकर्ताहरूको सहभागिता रहेको थियो।
यो विषयमा आफ्नो प्रतिक्रिया दिनुहोस् !