विद्यालय व्यवस्थापन समितिको विवादमा एक घाइते, आरोपितलाई छाडिएको आरोप

जनकपुरधाम, साउन २४ गते । धनुषा जिल्लाको सबैला नगरपालिका ७ स्थित श्री राष्ट्रिय अधारभुत बिधालय मटही विद्यालयको व्यवस्थापन समिति गठनका लागि भएको विवादमा एक स्थानीयलाई निर्घात कुटपिट गरी घाइते बनाइएको छ ।
सो विद्यालयको व्यवस्थापन समितिमा सदस्य पदमा भाग लिने स्थानीय इन्द्रजीत सहनीलाई निर्घात कुटपिट गरी घाइते बनाइएको छ । हाल उनको उपचार जनकपुरधामस्थित रामजानकी हस्पिटलमा भइरहेको छ ।

प्राप्त जानकारी अनुसार एमाले पार्टीबाट आस्था राख्ने सहनीलाई उनकै छिमेकी ५० बर्षिय बिन्देश्वर सहनी, उनका छोरा श्रवण सहनी, सरोज सहनी र सोलिन्दर सहनी लगायतका व्यक्तिहरुले कुटपिट गरी घाइते बनाएको हो ।

नेकपा माओवादी केन्द्रसँग आस्था राख्ने बिन्देश्वरका परिवारले पार्टीगत हिसाबले आफूलाई कुटपिट गरेको आरोप ईन्द्रजीतको रहेको छ । घटना बारे उनले भने विद्यालय व्यवस्थापन समिति चुनावी प्रक्रियामा गएपछि घर फर्किदै गर्दा आफूलाई पुरुषोत्तम र रजिन्द्रको घरको बीचमा घेरा हालेर ज्यान मार्ने नियतले कुटपिट गरेको हो ।

इन्द्रजीतले भने विद्यालय व्यवस्थापन समिति गठनको लागि बोलाइएको अभिभावक भेलामा आफूसँग जितो सहनीका छोरा सुलिन्दर सहनीसँग समान्य विवाद भई धक्कामुक्की भएको थियो । त्यतिबेला प्रहरीले आफू दुवै जनालाई सम्झाई बुझाई गरी घर पठायो । तर अभिभावक भेलाबाट समितिको लागि चुनावी प्रक्रिया गएपछि आफू घर फर्किदै गर्दा पुनः घेरा हालेर सबै जना मिली कुटपिट गरेर घाइते बनायो ।

यता, ईलाका प्रहरी कार्यालय सबैलाले आरोपित मध्येका श्रवण सहनीलाई पक्राउ गरेर छोडिदिएको भन्दै पिडीत पक्षले आपति जनाएका छन । पीडित पक्षले अस्पतालमा उपचाररत रहँदा नै प्रहरीले राजनीतिक दबाबमा श्रवणलाई छाडनु गलत रहेको गुनासो गरेका छन ।

पिडीत पक्षले कुटपिट गरेका बिन्देशवर सहनीमाथि यसअघि कतिको निवेदन इलाका प्रहरी सबैला दर्ता भएपनि प्रहरीले नै उन्मुक्ति दिदै आएको क्रममा आफूहरुले निवेदन दर्ता गराएपनि आरोपित मध्येका श्रवणलाई राजनीतिक दबावमा प्रहरीले छाडेको आरोप दिएका छन ।

यता ईलाका प्रहरी कार्यालय सबैलाका प्रमुख राजकुमार सिंहले विवाद चाहिं विद्यालय व्यवस्थापन समितिका लागि भएको थियो, तर आफूहरुले सम्झाई बुझाई पठाइदिएपछि गाउँमा झै झगडा भएको हो । जहाँसम्म आरोपितलाई पक्राउ गरी छाडिएको कुरा हो यो गलत आरोप हो ।

गाउँमा भएको झगडा सम्बन्धमा दुवै पक्षबाट उजुरी आएको छ, तर कुनै पक्षबालाई कसैलाई पक्राउ गरिएको छैन । घटनाको छानबीन भइरहेको छ, छानबीनपछि दोषी देखिएकालाई कारवाही हुनेछ ।