जनकपुरधाम । धनुषाको मुखियापट्टी मुसहरनिया गाउँपालिका–२ स्थित वडा कार्यालय, स्वास्थ्य कार्यालय र हुलाक कार्यालयमा भएको तोडफोड, लुटपाट तथा आगजनी घटनामा गाउँपालिका अध्यक्ष जयकुमार यादवकै संलग्नता रहेको आरोप लगाइएको छ।
उक्त घटनाबारे आवश्यक अनुसन्धान र कारबाहीको वडाध्यक्ष नरेश प्रसाद यादवले जिल्ला प्रशासन कार्यालय धनुषासंग माग गरेको छ। उनले कारवाहीकाे माग गर्दै प्रमुख जिल्ला अधिकारी प्रेमप्रसाद लुइटेललाई निवेदन दिएका छन् ।
वडाध्यक्षका अनुसार २०८२ भदाै २४ गते राति करिब २:३० बजे अज्ञात समूहले ती कार्यालयहरूमा आक्रमण गर्दै तोडफोड, लुटपाट र आगजनी गरेका थिए। घटनाबाट कार्यालयहरू पूर्ण रूपमा क्षतिग्रस्त भएकाे थियाे । सो घटनाको दृश्य सीसीटीभी फुटेजमा समेत कैद भएकोमा साे बमाेजिम कारवाहीकाे माग गरेकाे छ ।
वडा कार्यालयले जिल्ला प्रहरी कार्यालय धनुषालाई घटनाको अनुसन्धानका लागि आवश्यक प्रमाणसहित निवेदन दिएको र समयमै सहयोग पनि गरेको जनाएको छ। तर, पछिल्लो विवरणअनुसार घटनामा संलग्न व्यक्तिहरूले पूर्वयोजना बनाएर नै आक्रमण गरेको दाबी गरिएको छ।
पत्रमा उल्लेख भएअनुसार गाउँपालिका अध्यक्ष जयकुमार यादवले घटना हुनुभन्दा केही समयअघि नै अपराधीहरू फोन सम्पर्क रहेकाे र आफ्नाे निवासमा बैठक बसेर योजना बनाएको गतिविधि निजकाे निवासमा लगाइएकाे सीसीटीभी फुटेजबाट समेत पुष्टि हुने दाबी गरिएको छ।
वडा कार्यालयले अध्यक्ष यादवमाथि भ्रष्टाचारसम्बन्धी प्रमाणहरू नष्ट गर्नकै उद्देश्यले कार्यालयहरूमा आगजनी गराइएको आशंका व्यक्त गरेको छ। साथै, अध्यक्षले आफ्ना विरुद्धका प्रमाणहरू नष्ट गर्न भूमिका खेलेको आरोपसमेत साे निवेदनमा लगाइएको छ।
वडा कार्यालयले साे निवेदन पत्रकाे प्रधानमन्त्री तथा मन्त्रिपरिषद्को कार्यालय, गृह मन्त्रालय, मधेश प्रदेश सरकार, जिल्ला प्रहरी कार्यालय धनुषा र पत्रकार महासंघलगायत निकायमा समेत बोधार्थ पठाउँदै निष्पक्ष छानबिन र दोषीमाथि कडा कारबाहीको माग गरेको छ।
पालिकामा घटनाबारे सप्रमाण वडाबाट पेश गर्दा गाउंपालिका अध्यक्ष जयकुमारले आफू फंस्ने डरले कारवाही प्रक्रिया अघि नबढाएकाे आराेप समेत वडाध्यक्ष नरेशकाे रहेकाे छ । यता जिल्ला प्रशासन कार्यालयले जिल्ला प्रहरी कार्यालय धनुषालाई आवश्यक कारवाही प्रक्रिया अघि बढाउन पत्राचार समेत गरेकाे बुझिएकाे छ ।
स्थानीय तहकै प्रमुखमाथि यस्तो गम्भीर आरोप लागेपछि घटनाले थप राजनीतिक र प्रशासनिक तरंग सिर्जना गरेको छ। अहिले यस घटनाको निष्पक्ष अनुसन्धान हुने वा नहुने भन्ने विषयमा स्थानीयस्तरमा चासो बढेको छ।
यो विषयमा आफ्नो प्रतिक्रिया दिनुहोस् !