जनकपुरधाम । धनुषाको धनुषाधाम नगरपालिकामा कार्यरत एक कर्मचारीले नगरप्रमुखबाट गालीगलौज, धम्की तथा अभद्र व्यवहार भएको आरोप लगाउँदै शान्ति सुरक्षा माग गरेका छन्। उनले प्रमुख जिल्ला अधिकारी, धनुषासमक्ष निवेदन दर्ता गर्दै कानुनी कारबाहीको माग गरेका हुन्।
निवेदनमा आर्थिक प्रशासन शाखामा कार्यरत सहलेखापाल सुरेश कुमार मण्डलमाथि नगरप्रमुखले बारम्बार दबाब, धम्की र अभद्र व्यवहार गरेको उल्लेख छ। कार्यालयमा रहेको लेखा शाखाको कार्यसम्पादन, बेरुजु तथा अख्तियार दुरुपयोग अनुसन्धान आयोगबाट भइरहेको अनुसन्धानको सन्दर्भमा विवाद बढ्दै गएको र त्यसै क्रममा नगरप्रमुखले फोनमार्फत धम्की दिएको दाबी गरिएको छ।
निवेदनअनुसार अख्तियार दुरुपयोग अनुसन्धान आयोगको बर्दिवास कार्यालयबाट अनुसन्धान भइरहेको बेला कार्यालयमा प्रयोग भइरहेको मोबाइलसमेत परीक्षण गरिएको थियो। त्यसपछि नगरप्रमुखले आफूविरुद्ध अनुसन्धान भइरहेको भन्दै कर्मचारीमाथि दबाब सिर्जना गरेको, पटक–पटक फोन गरी अपशब्द प्रयोग गरेको तथा कार्यालयमा आएर दुर्व्यवहार गरेको आरोप लगाइएको छ।
कर्मचारी मण्डलले नगरप्रमुखले “कार्यालयमा आएर भेट” भन्दै धम्कीपूर्ण शैलीमा बोलाएको, नजाँदा थप दबाब दिएको र काम गरिरहेको समयमा समेत फोनमार्फत मानसिक दबाब सिर्जना गरेको उल्लेख गरेका छन्।
नगरप्रमुखको व्यवहारका कारण आफू असुरक्षित महसुस गरेको भन्दै उनले जिल्ला प्रशासन कार्यालयसँग सुरक्षा व्यवस्था मिलाइदिन तथा गालीगलौज र अभद्र व्यवहारसम्बन्धी मुद्दा दर्ता गर्न अनुरोध गरेका छन्।
निवेदनमा नगरपालिकाको कामकाज प्रभावित हुने गरी राजनीतिक र व्यक्तिगत दबाब दिइएको तथा कार्यालयभित्रको कागजातसम्बन्धी विषयमा समेत अनावश्यक हस्तक्षेप गरिएको आरोप पनि लगाइएको छ।
घटनाबारे सम्बन्धित निकायले आवश्यक छानबिन गरी दोषीमाथि कानुनअनुसार कारबाही गर्न तथा आफूलाई शान्ति सुरक्षाको प्रत्याभूति दिलाउन निवेदकले माग गरेका छन्।
यो विषयमा आफ्नो प्रतिक्रिया दिनुहोस् !