राजविराज, वैशाख १ गते । लकडाउन उल्लंघनका विषयमा प्रहरीसँगको भएको विवादको क्रममा सप्तरीमा बेहोश भएर एक वृद्धाको मृत्यु भएको छ ।
सो घटनालाई लिएर प्रहरीले बिरामी भएको कारण बेहोस भएर आफै मरेको हो तर स्थानीयले कुटेर मारेको आरोप लगाएका छन ।
सप्तरीको खड्ग नगरपालिका ६ बीरपुरमा लकडाउन उल्घंघन गरेर सर्वसाधारण बाहिर निस्केको सूचना पाएर पुगेको इलाका प्रहरी कार्यालय कल्याणपुरको टोलीसँग स्थानीय वासिन्दाको विवाद भएको थियो ।
‘हामीले काम नगरे खाना सरकारले दिनुर्पयो नि । हामी भोकै बस्ने हो ? भन्दै प्रहरी सँग केही व्यक्तिले विवाद गर्न थाल्यो त्यही क्रममा एक ६५ बर्षीया जयनव खातुन बेहोस भएकी थिइन पछि उनको मृत्यु भएको सप्तरीका प्रहरी प्रवक्ता एवं डीएसपी तिलक भारतीले भने ।
बेहोस भएकी वृद्धा पहिलादेखि नै मुटु रोगी थिए, बेहोस भएपछि उनलाई स्थानीय अस्पतालमा प्राथमिक उपचार गराई थप उपचारका लागि गजेन्द्रनारायण सिंह सगरमाथा अंचल अस्पतालमा ल्याउने बित्तिकै उनको मृत्यु भएको प्रहरीले जनाएको छ ।
प्रहरीले आफैं बेहोस भएको बताएपनि स्थानीयले लकडाउन उल्लंघन रोक्न गएको प्रहरीले उनलाई कुटेपछि उनी बेहोस भएको र पछि कुटाईबाट नै उनको मृत्यु भएको आरोप लगाएका छन ।
जयनवका पति हाजी कमरुद्धिन ट्याक्टरमा सामान लोड गरिरहँदा प्रहरीले उनी र पत्नी जयनवलाई कुटेको स्थानीयको भनाई छ ।
यो विषयमा आफ्नो प्रतिक्रिया दिनुहोस् !