जनकपुरधाम । अनुचित लेनदेन (मिटरब्याज) सम्बन्धी विभिन्न मुद्दामा पक्राउ परेका धनुषाको जनकपुरधाम उपमहानगरपालिका–१६, कपिलेश्वरका एकै परिवारका तीन जनालाई जिल्ला अदालत धनुषाले पुर्पक्षका लागि थुनामा पठाउने आदेश गरेको छ ।
अदालतले ५३ वर्षीय गोपाल साह, उनकी भाइबुहारी ४८ वर्षीया रेखा कुमारी साह र रेखाका ३२ वर्षीय छोरा हरेराम साहलाई पुर्पक्षका लागि थुनामा राख्न आदेश दिएको हो । उनीहरूमाथि दायर भएका ६ वटा मुद्दामध्ये गोविन्द साहले दिएको मुद्दामा तीनै जनालाई थुनामा राखेर मुद्दाको पुर्पक्ष गर्ने आदेश भएको जिल्ला अदालत धनुषाका श्रेस्तेदार दीपक पोखरेलले जानकारी दिए ।
इजलास नम्बर ११ मा न्यायाधीश हिरामाया अवालको एकल इजलासले बिहीबार उक्त आदेश गरेको हो । बाँकी पाँच मुद्दामा भने प्रतिवादीहरूलाई जनही एक लाख रुपैयाँ धरौटी माग गरिएको श्रेस्तेदार पोखरेलले बताए ।
मिटरब्याजसम्बन्धी उजुरी परेपछि प्रहरीले साह परिवारका सदस्यहरूलाई पक्राउ गरी अनुसन्धान अघि बढाएको थियो । अनुसन्धान पूरा भएपछि उनीहरूलाई अदालतमा पेस गरिएको थियो । तत्काल प्राप्त प्रमाणका आधारमा अदालतले तीनै जनालाई थुनामा राखेर मुद्दाको पुर्पक्ष गर्ने निर्णय गरेको हो ।
अदालतको आदेशमा गोविन्द साहले दिएको जाहेरी तथा जाहेरवालासहित रामरतन पासमान, रामऔतार साह र रोहितकुमार साहले दिएको घटना विवरणलाई प्रमाणका रूपमा उल्लेख गरिएको छ । त्यसैगरी, प्रतिवादीहरूले बयानका क्रममा जाहेरवालालाई रकम दिन वा दिलाउने कार्य गरेको स्वीकार गरेको विवरणलाई समेत अदालतले आधार बनाएको छ ।
मुद्दामा जोडिएको कि.नं. ७१३ को जग्गा रेखा कुमारी साहको नाममा दर्ता रहेको भए पनि हाल उक्त जग्गा जाहेरवाला रेणु साहकै हकभोगमा रहेको देखिएको सर्जमिन मुचुल्का र जनकपुरधाम उपमहानगरपालिका–१६ नम्बर वडा कार्यालयको पत्रलाई पनि अदालतले प्रमाणका रूपमा लिएको छ ।
त्यस्तै, मुद्दाको मिसिलमा संलग्न अडियो क्लिपमा भएको कुराकानी वास्तविक रहेको कुरा प्रतिवादीहरूले समेत स्वीकार गरेको अदालतको आदेशमा उल्लेख छ । तत्काल प्राप्त प्रमाणको अवस्थाबाट आरोपितहरूलाई यही चरणमा निर्दोष भन्न सकिने अवस्था नरहेको ठहर गर्दै अदालतले थप प्रमाण बुझ्दै जाँदा कानूनबमोजिम हुने गरी हाललाई थुनामा राखेर मुद्दाको पुर्पक्ष गर्ने आदेश दिएको हो ।
अदालतले मुलुकी फौजदारी कार्यविधि संहिता, २०७४ को दफा ६७ बमोजिम तीनै जनालाई पुर्पक्षका लागि थुनामा राख्ने आदेश गरेको हो । आदेशपछि आवश्यक कानुनी प्रक्रिया पूरा गरेर गोपाल साह र हरेराम साहलाई जलेश्वर कारागार पठाइएको छ । महिला बन्दी राख्ने व्यवस्था जलेश्वर कारागारमा नभएकाले रेखा कुमारी साहलाई सिन्धुली कारागार पठाइएको अदालतका श्रेस्तेदार पोखरेलले बताए ।
साह परिवारविरुद्ध परेको अन्य मुद्दामा बहरु राउतले गोपाल साह, रामरती देवी र रामझरी देवीलाई प्रतिवादी बनाएका छन् । गोविन्द साहको मुद्दामा हरेराम साह, रेखा कुमारी साह, गोपाल साह र फरार रहेका बलराम साहलाई प्रतिवादी बनाइएको छ ।
त्यसैगरी, मो. कासिमको मुद्दामा रेखा साह र हरेराम साह, निलम कुमारीको मुद्दामा पनि रेखा साह र हरेराम साह तथा मो. युसुफ राईन र राजीवकुमार सिंह दनुवारले दिएको मुद्दामा गोपाल साहलाई प्रतिवादी बनाइएको छ । मुद्दामा प्रतिवादी बनाइएका बलराम साह भने हाल फरार रहेको बताइएको छ । उनी रेखा कुमारी साहका श्रीमान् हुन् ।
अदालतले गरेको आदेश अन्तिम फैसला भने होइन । मुद्दाको सुनुवाइका क्रममा थप प्रमाण तथा दुवै पक्षका दाबी–प्रतिदाबी परीक्षण भएपछि मात्रै आरोप पुष्टि भए वा नभएको विषयमा अन्तिम निर्णय हुने छ ।
यो विषयमा आफ्नो प्रतिक्रिया दिनुहोस् !