जनकपुरधाम । जनकपुरधाम उपमहानगरपालिकाले रिक्त रहेका प्रशासनतर्फका पदमा कर्मचारी व्यवस्थापन गर्न अन्तरस्थानीय तह सरुवाको प्रक्रिया सुरु गरेको छ।
उपमहानगरपालिकाले मधेश प्रदेशका विभिन्न स्थानीय तहमा कार्यरत कर्मचारीलाई लक्षित गर्दै सरुवा सहमतिका लागि आवेदन माग गरेको हो। बिहीबार जारी गरिएको सूचनामार्फत स्वीकृत संगठन संरचना तथा दरबन्दीअनुसार खाली रहेका पदमा सरुवा भएर आउन इच्छुक कर्मचारीबाट निवेदन माग गरिएको छ।
उपमहानगरपालिकाका अनुसार प्रशासन सेवाअन्तर्गत सामान्य प्रशासन समूहमा तह ५÷६ का सहायक पाँचौँ वा अधिकृत छैठौँ तथा तह ४ को सहायक चौथो पद रिक्त रहेको छ।
मधेश प्रदेशको ‘स्थानीय सेवा (गठन तथा सञ्चालन) ऐन, २०८१’ को दफा २५ को उपदफा (१) लाई आधार बनाएर सरुवा प्रक्रिया अघि बढाइएको उपमहानगरपालिकाले जनाएको छ। सो व्यवस्थाअनुसार प्रदेशभित्रका स्थानीय तहमा कार्यरत आफ्नो सेवा, समूह र पदसँग मेल खाने कर्मचारीले जनकपुरधाम उपमहानगरपालिकामा सरुवाका लागि सहमति माग गर्दै आवेदन दिन सक्नेछन्।
प्रमुख प्रशासकीय अधिकृत ज्ञानहरी घिमिरेले जारी गरेको सूचनामा सरुवाका लागि इच्छुक कर्मचारीलाई निर्धारित प्रक्रिया पूरा गरी निवेदन पेश गर्न आग्रह गरिएको छ।
उपमहानगरपालिकाले रिक्त दरबन्दी पूर्ति गर्दै जनशक्ति व्यवस्थापनलाई व्यवस्थित बनाउने र स्थानीय तहबाट प्रवाह हुने प्रशासनिक सेवालाई थप प्रभावकारी बनाउने उद्देश्यले अन्तरस्थानीय तह सरुवा प्रक्रिया अघि बढाएको जनाएको छ।
यो विषयमा आफ्नो प्रतिक्रिया दिनुहोस् !