जनकपुरधाम, ५ असाेज । जनकपुरधाममा डिजिटल बैंकिङमार्फत सेवाग्राहीको खाताबाट उनको जानकारीबिनै रकम अन्य खातामा स्थानान्तरण भएको घटना सार्वजनिक भएको छ ।
जनकपुरधाम उपमहानगरपालिका–१० निवासी रतिश दतकी श्रीमती रजनी कर्णको नबिल बैंक खाताबाट ७० हजार १० रुपैयाँ अनधिकृत रूपमा ट्रान्सफर भएको हो ।
रजनीको पिडारी चोकस्थित नबिल बैंक शाखामा रहेको खाताबाट गत सेप्टेम्बर २० मा मोबाइल बैंकिङको माध्यमबाट प्राइम कमर्सियल बैंकमा रहेको अर्को व्यक्तिको खातामा रकम पठाइएको बैंक स्टेटमेन्टबाट देखिएको छ ।
स्टेटमेन्टअनुसार नबिल बैंकमा रहेको रजनीको खाताबाट मो. शेख फैजल जमालको नाममा रहेको प्राइम कमर्सियल बैंकको खातामा एकैपटक ७० हजार १० रुपैयाँ स्थानान्तरण भएको छ ।
आफूले उक्त दिन कुनै कारोबार नगरेको र कसैलाई रकम पठाउन स्वीकृति नदिएको रजनीको भनाइ छ । खातामा रहेको रकम घटेको थाहा पाएपछि कारोबार विवरण जाँच गर्दा आफूलाई जानकारी नै नभएको कारोबार भएको पत्ता लागेको उनले बताइन् ।
घटनाबारे बैंकमा जानकारी गराउँदा आफ्नो खाताबाट अनधिकृत रूपमा रकम स्थानान्तरण भएको जानकारी पाएपछि उनले प्रहरीमा उजुरी दिएकी हुन् ।
रजनीले सोमबार जिल्ला प्रहरी कार्यालय धनुषामा निवेदन दर्ता गराउँदै खाताबाट रकम कसरी र कुन माध्यमबाट निकालियो भन्ने विषयमा छानबिन गरी संलग्न व्यक्तिको पहिचान गर्न माग गरेकी छन् । साथै, अनधिकृत रूपमा स्थानान्तरण भएको रकम फिर्ता गराइदिनसमेत उनले आग्रह गरेकी छन् ।
प्रहरीमा दिइएको निवेदनमा नबिल बैंकको पिडारी चोक शाखामा रहेको आफ्नो खाता ‘हाइजेक’ गरी प्राइम कमर्सियल बैंकको खातामा रकम पठाइएको दाबी गरिएको छ । तर, खातामा पहुँच कसरी प्राप्त भयो, मोबाइल बैंकिङको पासवर्ड वा ओटीपीलगायत विवरण कसरी प्रयोग भयो भन्ने विषय अझै खुलेको छैन ।
घटनाबारे जिल्ला प्रहरी कार्यालय धनुषाले अनुसन्धान थालेको जनाएको छ । अनुसन्धानका क्रममा प्रहरीले नेपाल राष्ट्र बैंकसहित सम्बन्धित बैंकसँग कारोबार तथा खातासम्बन्धी आवश्यक विवरण माग गरेको छ ।
मोबाइल बैंकिङमार्फत ठगीका घटना बढ्दो
धनुषामा बैंकिङ कसूर तथा ठगीसम्बन्धी उजुरीको संख्या पछिल्लो समय बढिरहेको प्रहरीको तथ्यांकले देखाएको छ ।
जिल्ला प्रहरी कार्यालय धनुषाका प्रवक्ता डीएसपी ओमप्रकाश खनालका अनुसार गत भदौमा बैंकिङ कसूरतर्फ ४ र ठगीतर्फ १३ वटा मुद्दा दर्ता भएका थिए । त्यसअघि साउनमा बैंकिङ कसूरतर्फ ११ तथा ठगीतर्फ १४ वटा मुद्दा दर्ता भएका थिए ।
डीएसपी खनालका अनुसार मोबाइल बैंकिङ तथा डिजिटल माध्यमबाट रकम स्थानान्तरणसम्बन्धी घटना प्रत्येक महिना उल्लेख्य संख्यामा प्रहरीसम्म पुग्ने गरेका छन् । तीमध्ये कतिपय घटनाको समाधान भइसकेको र केही घटनामा अनुसन्धान जारी रहेको उनले बताए ।
रजनी कर्णको खाताबाट भएको रकम स्थानान्तरण पनि त्यही प्रकृतिको घटना हो वा खातामा अन्य कुनै माध्यमबाट पहुँच प्राप्त गरी रकम निकालिएको हो भन्ने कुरा अनुसन्धानपछि मात्रै यकिन हुने प्रहरीले जनाएको छ ।
सेवाग्राहीको अनुमति र जानकारीबिना बैंक खाताबाट रकम स्थानान्तरण भएको यो घटनाले डिजिटल बैंकिङको सुरक्षा, मोबाइल बैंकिङमा प्रयोग हुने गोप्य विवरण तथा बैंकिङ प्रणालीमा अनधिकृत पहुँचको विषयलाई पुनः चर्चामा ल्याएको छ । घटनामा संलग्न व्यक्तिको पहिचान र रकम फिर्ताको अवस्था भने प्रहरी अनुसन्धान तथा सम्बन्धित बैंकबाट प्राप्त हुने थप विवरणपछि स्पष्ट हुनेछ ।
यो विषयमा आफ्नो प्रतिक्रिया दिनुहोस् !