जनकपुरधाम, १९ मंसिर । श्रीराम जानकी विवाह पञ्चमी महोत्सवको अवसरमा अनाजबाट बनाइने ११ हजार स्क्वायर फिटको भगवान सितारामको प्रतिमा बनाउने तयारी थालिएको छ ।
जनकपुरधाम उद्योग वाणिज्य संघका अध्यक्ष जितेन्द्र महासेठको संयोजकत्वमा रहेको श्री सीताराम अनाज प्रतिमा निर्माण समितिले ११ हजार स्क्वायर फिट भगवान रामजानकीको प्रतिमा निर्माणको तयारी तीव्र पारिएको मंगलवार एक पत्रकार सम्मेलन आयोजना गरी जनाइएको छ ।
गिनिज बुकमा नाम लेखाउने गरी जनकपुरधाममा अन्नबाट भगवान रामजानकीको प्रतिमा निर्माणका लागि तयारी थालिएको जनकपुरधाम उपमहानगरपालिकाका प्रमुख मनोजकुमार साहले जानकारी दिए । यसअघि भारतको अयोध्यामा मध्य प्रदेशका सतिश गुर्जरले ९ हजार स्क्वायर फिटको अन्नको प्रतिमा बनाएर विश्व रेकर्ड बनाए । उनै गुर्जरले अब जनकपुरधाममा ११ हजार स्क्वायर फिटको अन्नको प्रतिमा बनाएर आफ्नै रेकर्ड तोड्ने तयारीमा छन् ।
त्यो प्रतिमा निर्माणका लागि ७२ क्विन्टल विभिन्न ११ प्रकारका अन्नको प्रयोग गरिनेछ भने २१ लाख २३ हजार रुपैया लागत लाग्ने मेयर साहले जानकारी दिए । ६ ईन्च माटो भरेर समतल बनाई करिव तिन कठ्ठा जमिनमा कार्पेट ओछयाएर प्रतिमा बनाइने जस्का लागि भारत मध्य प्रदेशका कलाकार सतिश गुर्जर जनकपुरधाम आइपुगेको बताइएको छ ।
कलाकारहरुले मेहनत खर्च नलिने र निशुल्क प्रतिमा बनाउन लागेको बताइएको छ । अनाजमा आवयश्क पर्ने २५ क्वीन्टल चामल जानकी मन्दिरका सहायक महन्त रामरोशन दास, १८ क्वीन्टल कालो उरिदको दाल जनकपुर चिकित्सक एशोसिएसन, निजि अस्पताल सञ्चालक संघ धनुषाका अध्यक्ष डा. एसके सिंह सहितका संघ संस्था र व्यक्तिहरुले व्यवस्थापनको जिम्मा लिएको पत्रकार सम्मेलनमा जनाइएको छ ।
रंगभूमि मैदानमा अन्नबाट ११ हजार स्कावयर फिटको राम–जानकीको प्रतिमा बनाउने निर्णयप्रति सामाजिक सञ्जालमा देशमा भोकमरी रहेको अवस्था मूर्ति बनाउने नाममा खेर फाल्नु कार्य गलत रहेको भनी व्यापक विरोध हुदै आएकोमा मेयर साहले ९० प्रतिशत अनाज पुनः काम लाग्ने र १० प्रतिशतलाई पिसाएर गौशालामा गाईबस्तुलाई खुवाइने बताए । बिश्व हिन्दु परिषदका धनुषा अध्यक्ष सन्तोष कुमार साह र संयोजक महासेठको नाममा संयुक्त खाता खोलेर आर्थिक संकलन तथा खर्च विवरण पछि सार्वजानिक हुने गरि व्यवस्थापन मिलाइएको मेयर साहले बताए ।
यसवर्ष अगामी पुस १ गते विवाह पञ्चमी परेको छ । जनकपुरधाममा साताव्यापी विवाह पञ्चमी कार्यक्रम अन्य वर्ष झै मनाइनेछ । विवाह महोत्सवको प्रमुख कार्यक्रम स्वयंवर हुने स्थल रंगभुमी मैदानमा करीब तीन कट्ठा क्षेत्रफलमा श्रीराम जानकी प्रतिमा निर्माण गरिने यसअघि नै उपमहानगरपालिकाले निर्णय गरिसकिएको छ । यसका लागि जनकपुरधाम उद्योग वाणिज्य संघको संयोजकत्वमा ११ सदस्यीय निर्माण समिति र उमहानगरपालिकाका मेयर मनोज साहको संयोजकत्वमा सल्लाहकार समिति गठन यसअघि नै गरिसकिएको छ ।
यो विषयमा आफ्नो प्रतिक्रिया दिनुहोस् !