जनकपुरधाम, फागुन २ गते । नेपाली कांग्रेसले आगामी फागुन ६ गते मधेसकाे जनकपुरधाममा हुने केन्द्रित चुनावी सभामार्फत आफ्नो घोषणापत्र सार्वजनिक गर्ने भएको छ।
यसअघि आइतबारका लागि तय गरिएको घोषणापत्र सार्वजनिक कार्यक्रम स्थगित गर्दै पार्टीले मधेसमै विशेष चुनावी सभा आयोजना गरी औपचारिक रूपमा प्रतिज्ञापत्र सार्वजनिक गर्न लागेको हो।
पार्टी प्रवक्ता देवराज चालिसेका अनुसार मधेशकाे जनकपुरधाममा आयोजना हुने चुनावी सभामा कांग्रेसको घोषणापत्र सार्वजनिक गरिनेछ। उनका अनुसार मधेसको राजनीतिक सन्देशलाई प्राथमिकता दिन तथा क्षेत्रीय मतदातासँग प्रत्यक्ष संवाद गर्न पार्टीले जनकपुरधामलाई घोषणापत्र सार्वजनिक गर्ने स्थलको रूपमा चयन गरेको हो।
उक्त सभामा पार्टीका सभापति गगन थापासहित केन्द्रीय नेताहरूको सहभागिता रहने जनाइएको छ। सभामा मधेस प्रदेशका नेता–कार्यकर्ता तथा सर्वसाधारणको उल्लेखनीय उपस्थिति रहने अपेक्षा गरिएको छ।
कांग्रेसले यसपटक ‘भिजन १०’ को अवधारणाअन्तर्गत घोषणापत्रलाई ‘प्रतिज्ञापत्र’ नाम दिएको छ। पार्टी स्रोतका अनुसार उक्त प्रतिज्ञापत्रमा आर्थिक समृद्धि, सुशासन, रोजगारी सिर्जना, शिक्षा–स्वास्थ्य सुधार, संघीयताको सुदृढीकरण र समावेशी विकासजस्ता विषयलाई प्राथमिकतामा राखिएको छ। मधेसका विशेष मुद्दा—पूर्वाधार विकास, कृषि आधुनिकीकरण, उद्योग प्रवर्द्धन र सीमावर्ती क्षेत्रको व्यवस्थापन—समेत समेटिने बताइएको छ।
जनकपुरधाममा घोषणापत्र सार्वजनिक गरेर मधेसमा सशक्त राजनीतिक सन्देश दिने रणनीति कांग्रेसले अपनाएको विश्लेषण गरिएको छ। चुनावी अभियानलाई तीव्र बनाउने उद्देश्यसहित आयोजना गरिने उक्त सभालाई पार्टीले निर्णायक शक्ति प्रदर्शनका रूपमा लिएको छ।
यो विषयमा आफ्नो प्रतिक्रिया दिनुहोस् !