जनकपुरधाम, २ फागुन । साहित्य, कला र नाट्यकर्मको संगमका रूपमा चिनिएको जनकपुरधाममा “जनकपुरधाम साहित्य, कला तथा अन्तर्राष्ट्रिय नाट्य महोत्सव”को पाँचौँ श्रृंखला भव्य रूपमा आयोजना हुने भएको छ।
मैथिली विकास कोषको आयोजना तथा शिक्षा तथा संस्कृति मन्त्रालय र जनकपुरधाम उपमहानगरपालिकाको सह–आयोजनामा हुने महोत्सव फागुन ५ देखि ८ गते (१७–२० फेब्रुअरी २०२६) सम्म सञ्चालन हुनेछ।
शनिबार आयोजित पत्रकार सम्मेलनमा कोषका अध्यक्ष जीवनाथ चौधरीले मैथिली भाषा, साहित्य र संस्कृति समुदायको पहिचान भएको उल्लेख गर्दै महोत्सवले चार दिनसम्म भाषा, साहित्य, कला, नाटक तथा सामाजिक विमर्शलाई जीवन्त बनाउने विश्वास व्यक्त गरे। उनले जनकपुरधामवासीको सक्रिय सहभागितालाई नै महोत्सव सफलताको मुख्य आधार बताए।
उनका अनुसार कोष स्थापना कालदेखि नै भाषा, साहित्य, संस्कृति र कलाको संरक्षण–प्रवर्द्धनमा क्रियाशील छ। प्रत्येक दुई वर्षमा आयोजना हुने यो महोत्सवले सांस्कृतिक सृजनालाई प्रोत्साहन मात्र नभई सामाजिक न्याय, स्त्रीवाद, दलित विमर्श, शिक्षा र समसामयिक मुद्दामा गहन बहसको साझा मञ्च प्रदान गर्दै आएको छ।
२० भन्दा बढी कार्यक्रम, शोभायात्रासहित उद्घाटन
महोत्सवमा २० भन्दा बढी विविध कार्यक्रम समावेश छन्। उद्घाटन समारोहपछि शहरमा शोभायात्रा तथा सांस्कृतिक झाँकी प्रस्तुत गरिनेछ। विद्यालयस्तरीय वक्तृत्वकला, कविता वाचन, लोकनृत्य प्रतियोगिता, मिथिला चित्रकला कार्यशाला तथा प्रदर्शनी, पुस्तक प्रदर्शनी र मैथिली आख्यान लेखन कार्यक्रम आयोजना गरिने जनाइएको छ।
नेपाल–भारतका नाट्य समूहको प्रस्तुति
नाट्यतर्फ नेपालको मिनाप, रंगदर्पण जनकपुर र भारतको चेतना समिति पटना लगायतका समूहले प्रस्तुति दिनेछन्। ‘छुतहा घैल’, ‘कथा नइ भेटल’, ‘जटजटिन’ र ‘देसिल बयना बहुरुपिया’ जस्ता प्रमुख नाटक मञ्चन गरिनेछन्।
महोत्सव अवधिभर ‘उठलै किए विहाडि? (राजनीति)’, ‘पग पग पोखरी पियासल लोक’, ‘भाषा: राजकाज र समाज’, ‘मैथिली साहित्यक समकालीन स्त्रीवाद’ र ‘सामाजिक सञ्जाल: अवसर र चुनौती’ जस्ता विषयमा विशेषज्ञहरूले धारणा राख्नेछन्।
विशेष आकर्षणका रूपमा मिथिला भोजन प्रदर्शनी, चित्रकला तथा हस्तकला प्रदर्शनीका साथै नेपाली र भारतीय विद्वान तथा गायक–गायिकाको सांस्कृतिक प्रस्तुति रहनेछ।
फागुन ८ गते समापन समारोहमा पुरस्कार वितरण, कवि गोष्ठी तथा सांस्कृतिक कार्यक्रम आयोजना गरिनेछ। आयोजकले महोत्सवमार्फत भाषा, साहित्य, कला र संस्कृतिप्रतिको जनसहभागिता थप सशक्त बनाउने लक्ष्य राखेको जनाएको छ।
यो विषयमा आफ्नो प्रतिक्रिया दिनुहोस् !