जनकपुरधाम, चैत ४ गते । धनुषाको सबैला नगरपालिकामा यादव चोक नाममा राख्ने विषयमा भएको विवादको क्रममा प्रहरीले चलाएको गोली एक युवकको मलद्वारमै लागेको छ ।
नगरपालिका वडा नम्बर ९ भठिहनस्थित रहेको कोल्हुवामोडको नाम भैरव चौक हटाएर एक समुदायले जबरदस्ती यादवचोक राख्न खोजेपछि उत्पन्न विवादले अवस्था तनावग्रस्त बनेपछि अवस्था नियन्त्रण लिन प्रहरीले चलाएको लागेर शहीद नगर नगरपालिकाका वडा नम्बर १ कुम्भकरणका सन्तोष यादव घाइते भएका हुन ।
विवादको क्रममा केही युवकहरुले प्रहरीमाथि ईट, ढुँगा बर्षाउन थालेपछि प्रहरीले स्थिति नियन्त्रणमा लिनको लागि गोली चलाएको थियो । कुम्भकरण भठिहन चोकबाट केही दूरीमा रहेको कोल्हुवामोडमा विवाद झडप भएको हो । घाइते सन्तोषलाई उपचारका जनकपुरधाम स्थित स्वास्थ्य विज्ञान प्रतिष्ठानको अस्पतालमा पठाइएको थियो ।
उपचार सम्भव नभएपछि थप उपचारका लागि सन्तोषलाई काठमाडौ रेफर गरिएको छ । सोमवार नै उनलाई नेपाली सेनाको स्काई ट्रकमार्फत काठमाडौँस्थित ट्रमा सेन्टर पठाइएको छ । सबैलाको भठिहनस्थित भौरव चोकमा एक पक्षले ‘यादव चोक’ लेखिएको बोर्ड राखेपछि अर्को पक्षले त्यसलाई उखाल्दा आइतबारदेखि नै दुई पक्षबीच विवाद चर्किएको थियो ।
यादव पक्षले विरोधीको घरमाथि ठुङ्गामुढा गर्न थालेपछि प्रहरीले विवाद सम्य पार्न खोज्दा उनीहरु उग्रभई प्रहरीमाथिनै आक्रामक भएपछि प्रहरीले आत्मरक्षामा गोली चलाएको धनुषा प्रहरीले जनाएको छ । राजाराम यादव भन्ने बस चालक एक समूहले यादव चोक भनेर बोर्ड झुण्डयाएको थियो । यस सम्बन्धमा आइतवार जिल्ला प्रशासन कार्यालयमा जानकारी समेत गराइएको बताइएको छ ।
ती कोल्हुवामोडको अहिलेसम्म नामाकरण हुन नसक्दा विवादित रहेको छ । ५÷६ महिना अगाडि ती कोल्हुवामोडको नाम भौरव चोक राख्ने भन्ने स्थानीयबीच सहमति भएको थियो ।
विवाद सबैला नगरपालिकामा भएपनि उनी शहिदनगर नगरपालिकाबाट जातको हिसाबले ढुँगामुढा गर्न गएको प्रहरीले जनाएको छ । जातीय झगडा भएको भन्दै उनी अर्को गाउँबाट ढुँगामुढा गर्न गएपछि प्रहरीले गोली चलाउँदा मलद्धारमै गोली लागेको हो । अहिले त्यहाँ व्यापक संख्यामा प्रहरी परिचालन गरिएका छ ।
यसैबीच सबैला नगरपालिकाका मेयर कारीराम यादवले यथाशीघ्र चोकको नामाकरण गर्ने प्रतिवद्धता जनाएका छन् । मेयर यादवले जातिय साम्प्रदायिक भड्काउने खालका चोकको नामाकरण नगरिने एक प्रेस विज्ञप्ति जारी गरी जनाएको छ । उनले आईतबार बसेको सर्वपक्षीय बैठकबाट चोकको नामाकरण सर्वमान्य हुने गरी राख्ने निर्णय भएको जनाएको छ ।
यो विषयमा आफ्नो प्रतिक्रिया दिनुहोस् !