जनकपुरधाम, भदौ २० गते । आगामी भदौ २९ गते जनकपुरधाम उद्योग वाणिज्य (जउवा) संघको नयाँ नेतृत्वका लागि निर्वाचन हुँदैछ । नेतृत्वमा पुग्न तीनजना व्यवसायीले अध्यक्ष पदका लागि उम्मेदवारी दिएका छन् ।
अध्यक्ष पदका लागि सुरेन्द्र भण्डारी, जितेन्द्र प्रसाद साह र मनिषरमण साहले उम्मेदवारी दिएका हुन् । भण्डारी निवर्तमान उपाध्यक्ष हुन् भने जितेन्द्र प्रसाद साह निवर्तमान वरिष्ठ उपाध्यक्ष र मनिषरमण साह वर्तमान वरिष्ठ उपाध्यक्ष हुन् ।
तीनै उम्मेदवारले आ आफ्नो गर्दै जित सुनिश्चित रहेको दाबी गर्छन । उम्मेदवारहरु आफ्नो पक्षमा माहौल बनाउनका लागि व्यापारी मतदातासमक्ष मत माग्नका लागि पुगिरहेका छन् । तर यी मध्ये होटल व्यवसायीको रुपमा परिचित एवं विभिन्न संघ संस्थासँग आबद्ध रही उद्योगी व्यवसायीहरुको हकहितमा वर्षौदेखि काम गर्दै आएका सुरेन्द्र भण्डारीको नाम बढी चर्चामा रहेको छ ।
त्यसको प्रमुख कारण हो उनी सहयोगी भावनाका हुन् । उद्योगी व्यवसायीले चाहेको जति बेलापनि खोज्दा उनी सहयोगका लागि हरदम पुग्ने गरेका छन् । भण्डारी युवा चेहरा भएपनि जउवा संघमा रहेर काम गर्ने मामिलामा अनुभवी चेहरा हुन् । उनी जउवा संघको कार्यकारिणी सदस्य, सचिव हुँदै उपाध्यक्ष पदसम्म पुगेर नेतृत्व सम्हाली सकेका छन् । पछिल्लो निर्वाचनमा बरिष्ठ उपाध्यक्ष पदमा भने भण्डारी पराजित भएका थिए ।
उपाध्यक्षसम्म पुगेर पनि सोचे अनुरुप उद्योग व्यवसायको विकासका लागि काम गर्न नसकेकाले आफू अध्यक्ष पदमा उम्मेदवारी दिएको भण्डारीले बताए । उनले भने, ‘उपाध्यक्ष पदमा निर्वाचित भएपछि मैले व्यवसायीको हकहितका लागि धेरै काम गर्ने प्रयास गरेँ । धेरै ठाउँमा बोलेँ । संस्थागत रूपमा काम गर्ने प्रयास गरेँ । तर उपाध्यक्षले चाहेर यहाँ केही गर्न सकिने रहेनछ,’ सुरेन्द्रले भने, ‘आफूले चाहेर पनि गर्न नसकेका धेरै कामहरू गर्न मैले अध्यक्ष पदमै उम्मेदवारी दिनुपर्यो ।’
उनले आफूले उठाउन खोजेका एजेण्डाहरू अन्य उम्मेदवारले उठाउन नचाहेका कारण उम्मेदवार बन्नु परेको बताए । लामो समय संघमा आवद्ध रहँदा उल्लेखनिय काम गरेको चर्चा गर्दै विगतमा आफू संघमा रहँदा व्यवसायिक हकहितमा धेरै काम भएको तर हालको नेतृत्वले प्रभावकारी काम गर्न नसकेकाले पनि आफूले उम्मेदवारी दिएको उनले बताए ।
उनले आफूलाई नेतृत्वमा रहेर उद्योग, व्यापार र व्यवसाय क्षेत्रको विकास अघि बढाउन उम्मेदवारी दिएको बताउँदै संघको गरिमा उच्च राख्न भूमिका खेल्ने दाबी गरेका छन् । जनकपुरधाम उद्योग वाणिज्य संघमा अहिले ४ हजार ७६ सदस्य मतदाता छन् ।
यो विषयमा आफ्नो प्रतिक्रिया दिनुहोस् !