सुभाष कर्ण/ जनकपुरधाम, ९पुस । मधेश प्रदेशका जनकपुरधामको जानकी मन्दिर अगाडि रहेका श्री लक्ष्मी मिष्ठान भण्डारले कर छली गर्न अवैध रुपमा कम्प्यूटर बिलिङ्ग गर्दै आइएको पाइएको छ ।
आन्तरिक राजश्व कार्यालय जनकपुधारमको लापरवाहीको कारण मौनता कारण प्यानमा दर्ता रहेका श्री लक्ष्मी मिष्ठान भण्डारले कर छली गर्न अवैध रुपमा कम्प्यूटर बिलिङ्ग गर्दै आएको हो । आन्तरिक राजश्व कार्यालयको नियमानुसार वार्षिक ५० लाख रुपैयाभन्दा कमको कारोबार गर्ने प्यानमा दर्ता र ५० लाखभन्दा माथि कारोबार गर्नेले अनिवार्य रुपमा भ्याटमा दर्ता हुनुपर्ने प्रावधान छ । तर भ्याटमा जानबाट बच्न ५० लाखभन्दा कम व्यवसाय देखाउन फर्जी कम्प्यूटर बिलिङ्ग गर्दै आएको छ ।
एउटै प्यान नम्बरमा संचालकले उपमहानगर कार्यालय नजिक र जानकी मन्दिर अगाडि गरी दुईवटा होटल संचालन गर्दै आएको छ । दैनिक लाखौ रुपैयाको कारोबार रहेका लक्ष्मी मिष्ठान भण्डारले प्यानमा दर्ता भएपनि ग्राहकलाई बिना प्यान, संस्थाको नाम उल्लेख नरहेका कम्प्यूटरकृत बिल दिइरहेका छन् । हुनत ग्राहकले माग गरेको अवस्थामा हस्तलिखित प्यान बील समेत दिन्छन । प्यानमा श्री लक्ष्मी मिष्ठान भण्डारले दर्ता छन् । प्यान बील पनि सोही नामले दिइरहेका छन् । तर राजश्व कार्यालयलाई झुक्याउन एउटा होटलको नाममा प्यान अनुसार नै राखेको छ भने अर्को होटलमा श्री हटाएर लक्ष्मी मिष्ठान भण्डार मात्रै राखेका छन् ।
आन्तरिक राजश्व कार्यालयका एक कर्मचारीका अनुसार कुनैपनि फर्म÷संस्थालाई कम्प्यूटर बील प्रदान गर्न राजश्वमा कुन सफ्टवेयर चलाउने जानकारी गराई त्यहाँबाट स्वीकृति सहित कोड नम्बर लिनुपर्ने हो । ग्राहकलाई बिल प्रदान गर्दा फर्म/संस्थाको नाम, प्यान/भ्याट नं. र राजश्व कार्यालयबाट प्राप्त कोड नम्बर अनिवार्य रुपमा उल्लेख गर्नुपर्ने हो ।
तर लक्ष्मी मिष्ठान भण्डारले एक ग्राहकलाई दिएको लोकपुकारलाई प्राप्त बीलमा न त फर्म/संस्थाको नाम, न प्यान/भ्याट नं. र न कोड नं. नै उल्लेख रहेको छ । सो बीलमा संस्थाको नाममा एडमीन, सामाग्री विक्री गरेको दररेट सहित नामावली, टेबल नम्बर मात्र उल्लेख छ । बीलको प्रकृति हेर्दा लक्ष्मी मिष्ठान भण्डारले राजश्वर कार्यालयसँग स्वीकृति नै नलिई कम्प्यूटर बिलिङ्ग गर्दै आएको छ । यति मात्र होइन सो मिष्ठान भण्डारले जनकपुरधामको अन्य होटलभन्दा दोब्बरभन्दा बढी चर्को मूल्य लिइ ग्राहकलाई लुटदै आएको देखिन्छ ।
होटलबाट ग्राहकलाई दिइने कम्प्यूटर बील फर्जी र दुवै होटलको एकैजना रहेको लक्ष्मी मिष्ठान भण्डारका संचालक पारस जैनले पनि स्वीकार गरेका छन् । लोकपुकारसँग मोबाइलमा कुरा गर्दै उनले भने राजश्व कार्यालयबाट कम्प्यूटर बिलिङ्ग गर्न स्वीकृति लिएको छैन, कुन टेबलमा कतिको दरको सामान गएको छ बिलिङ्गग गर्न आफ्नो सुविधाका लागि कम्प्यूटर बील दिने गरेका हौं । लक्ष्मी मिष्ठान भण्डार नामको दुवै होटल कसको हो भन्ने प्रसंगमा उनले शुरुमा आफ्नै जस्तो हो भन्ने, संचालक एउटै हो कि फरक व्यक्ति हो भनेपछि एउटै संचालक रहेको स्वीकार गरे ।
आन्तरिक राजश्व कार्यालय जनकपुरधामको मिलामतो र लापरवाहीले जनकपुरधाम बजारमा लक्ष्मी मिष्ठान भण्डार मात्रै होइन दर्जनौ व्यवसायी वर्षेणी करोडौ रुपैयाको कारोबार गरे कर छली गर्न ग्राहकलाई बिलै नदिने, बील दिएपनि स्टीमेट र कम्प्यूटरकृत बील दिने गरेको छ । खासगरी होटल, स्वास्थ्य संस्था, कोल्डस्टोर र किराना व्यवसायी छन् । राजश्व कार्यालयका कर्मचारीहरुकै मिलोमतोमा व्यवसायीहरु कर छली गर्दै आएको यी जस्ता व्यवसायीको घटनाले पुष्टि हुन्छ ।
यो विषयमा आफ्नो प्रतिक्रिया दिनुहोस् !