जनकपुरधाम, ६ पुस । धनुषाको हँसपुर नगरपालिका ५ सुगा निकासमा प्रहरीको कुटाईबाट एकको मृत्यु घटनामा आरोपित ईलाका प्रहरी कार्यालय सुगा निकासका सई तुलानन्द भन्ने बाल ठाकुरलाई जिल्ला प्रहरी कार्यालय धनुषामा तानिएको छ ।
घटना पश्चात प्रहरी र स्थानीयबीचको झडपले दिनभर तनावग्रस्त अवस्थालाई नियन्त्रण गर्न स्थानीयको माग अनुसार सई बाल ठाकुरलाई जिल्लामा तानेर उनको ठाउँमा सई दिलिपकुमार श्रेष्ठलाई पठाइएको छ । स्थानीयको आरोप अनुसार सई ठाकुरलाई ईप्रकामा राख्दा अवस्था झन बिग्रिन सक्ने अवस्था देखेर स्थानीय भरभलादमीको सल्लाहमा ईप्रकाको नयाँ इन्चार्जको रुपमा श्रेष्ठलाई पठाइएको जिप्रका धनुषाका प्रवक्ता डिएसपी रञ्जन अवाले जानकारी दिएका छन् ।
घटनामा संलग्न मुख्य आरोपी शंकर ठाकुरलाई नियन्त्रणमा लिई र सई ठाकुरलाई समेत जिल्ला तानेर छानबीन प्रक्रिया अघि बढाइएको डिएसपी अवाले बताएका छन् । सई ठाकुर जिल्लामा तानिएपछि सुगा निकासको अवस्था हाल सामान्य रहेको जिप्रकाले जनाएको छ ।
ईलाका प्रहरी कार्यालयमा दिपा भन्ने दिपनारायण मण्डलको प्रहरीको कुटाईबाट मृत्यु भएपछि आक्रोशित स्थानीयले प्रदर्शन गर्दा दोहरो झडप भएको थियो । झडपकै क्रममा प्रहरीको गोली लागेर स्थानीय ३६ वर्षीय शंकर मण्डल र १८ वर्षिय मतलुब अन्सारी घाइते भएका थिए । घाइते मध्ये अन्सारीको उपचार जनकपुरधामस्थित प्रादेशिक अस्पतालमा भई रहेको छ भने घाइते मण्डललाई थप उपचारकालागि काठमाडौँ रेफर गरिएको छ ।
पारिवारिक विवादमा स्थानिय दिपालाई शंकर ठाकुर र परिवार सहित छरछिमेकका व्यक्तिहरुले कुटपिट गरेको घटनामा आफ्ना नातेदारसँग झगडा गरेको रिसमा ईलाका प्रहरी कार्यालयका सई तुलानन्दले थुनामा राखेर बेस्सरी कुटपिट गर्दा उनको पिटाईबाट मण्डलको संवेदनशिल अंगमा चोट लागेर मृत्यु हुन गएको स्थानीयको आरोप रहेको छ ।
प्रहरी कुटाईबाट दिपाको मृत्यु भएको भन्ने खबर बाहिरिएपछि आक्रोशित स्थानीय एकाबिहानै ईप्रका अगाडि प्रदर्शन गर्दै घेराउ गर्न खोजेपछि अवस्था नियन्त्रण लिन प्रहरीले फायर गरेको गोली लागेर अन्सारी र मण्डल घाइते हुन भएको थियो । झडपको क्रममा स्थानीय ज २ उ ५६२६ र प्रदेश २—०२—००२ प ९८४७ नम्बरको दुईवटा प्रहरीको निजी मोटरसाइकलमा समेत आगलागी गरी क्षति पुरयाएका छन् ।
यो विषयमा आफ्नो प्रतिक्रिया दिनुहोस् !