जनकपुरधाम, ३० मंसिर । त्रेतायुगमा भगवान श्रीराम र जानकीको विवाहको स्मरणमा मनाइने विवाह महोत्सवको पांचौ दिन जनकपुरधाममा वैवाहिक पद्धतिको मटकोर सम्पन्न भएको छ ।
मटकोरमा जानकी मन्दिरबाट बाजागाजासहित महिलाहरु जनकपुरधामको ऐतिहासिक गंगासागरमा पुगि विहेको बेदी बनाउनका लागि माटो ल्याएका हुन् । महिलाहरु माटो बोकेर नगर परिक्रमा समेत गरेका थिए । मटकोरको क्रममा गंगासागरको डीलमा भजनकिर्तनको कार्यक्रम समेत राखिएको थियो ।
जानकीको प्रतिकको रुपमा रहेकी बालिकालाई लिएर बाजागाजासहित जानकी मन्दिरका उत्तराधिकारी महन्थ रामरोशन दास वैष्णव गंगासागर पुगेका थिए । सो मटकोर कार्यक्रममा प्रतिनिधि सभा सदस्य जुली महतो सहित हजारौ श्रद्धालु भत्तजनहरुको सहभागिता रहेको थियो ।
वैदिक मन्त्र उच्चारण गरि विधिपुर्वक जानकी मन्दिरमा भित्रयाइएको माटोले रामजानकी विवाहका लागि वेदी तयार गर्ने चलन रहेको छ । जनकपुरधाममा साताव्यापी विवाहपञ्चमी महोत्सव अन्तर्गत पहिलो दिन नगर दर्शन, दोस्रो दिन फुलवारी लीला, तेस्रो दिन धनुष यज्ञ, चोथौ दिन तिलकोत्सव र पाँचौ दिन मटकोर कार्यक्रम सम्पन्न भएको हो । आइतबार स्वयम्बर तथा विवाहोत्सव र सोमबार रामकलेवा गरी विवाहपञ्चमी महोत्सव सम्पन्न हुनेछ ।
यो विषयमा आफ्नो प्रतिक्रिया दिनुहोस् !