जनकपुरधाम, असोज १० गते । मधेश प्रदेश सरकारका अर्थमन्त्रालयको लापरवाहीका कारण प्रदेश सभा सदस्यहरु र कर्मचारीहरुले तीन महिनादेखि तलब खान सकेको छैन ।
अर्थ मन्त्री संजय यादवको लापरवाहीले प्रदेश सभा सदस्य तथा कर्मचारीहरु दशैंको मुखमा पेश्की खाने बेलामा तीन÷तीन महिनाको तलब खान पाएका छैनन । केही कर्मचारीहरुले तलब निकासाका लागि अख्तियारी नदिंदा साउन महिनादेखि तलब खान नसकेको गुनासो गरेका छन् । अर्थमन्त्रालयका एक कर्मचारीका अनुसार पहिलो चौमासिक रकम केन्द्रिय सरकारबाट निकासा आइसकेको छ । तर अर्थमन्त्री के कति कारण रोकेको बुझ्न नसकेको बताए ।
जनमत पार्टीका सांसद त्रिभुवन साहले भने अर्थ मन्त्रालयको ढिलासुस्तीका कारण तलब पाउन समस्या भएको हो । अर्थ मन्त्रालयको अख्तियारी खोजेका कारण तलब खुवाउन समस्या उत्पन्न भएको उनको बुझिन आएको उनले बताए । एमालेका प्रदेश सांसद दिपेन्द्र ठाकुरले पनि गएको तीन महिनादेखि प्रदेश सभाले तलब नखुवाएको बताएका छन् । उनले भने आफू बुझेसम्म सचिवालयले पीएलएमबीआईएस कोड कनेक्ट नभएको कारण अर्थमन्त्रलायबाट निकासा नभएको हो ।
जसपाका सांसद मनिष सुमनले भने मेरो यो दोश्रो कार्यकाल यसरी तीन/तीन महिनासम्म सांसदहरुको तलब रोक्नु यो पहिलो घटना हो । अहिले दशैं पेश्की समेत खाने समय आइसकेको बेलामा माननीयका पिए, विषयगत समितिमा कार्यरत कर्मचारीहरु समेतको पनि तलब रोक्नु गलत हो । तिनीहरु गरीब परिवारका हुन्छन तीन/चार महिनासम्म तलब रोक्दा तिनीहरुको जनजिविका कसरी चल्ने बारे पनि सरकारले बुझ्नु पर्ने हो ।
उता प्रदेश सभा सचिवालयका सचिव रञ्जित यादवले के कति कारण तलब रोकिएको हो बारे अर्थमन्त्रालयसँग सोध्नु भनेर पन्छिने प्रयास गरेका छन् । उनले भने सफ्टवेयर समस्याका कारण तलब रोकिन गएको हो । तर केही दिनमै सबै माननीय र कर्मचारीहरुको तलब पठाई दिइनेछ । प्रदेश सभा सदस्य मात्रै होइन ११ वटा मन्त्रालय मध्ये गृह, सञ्चार तथा कानून लगायतका दुई÷तीन वटा मन्त्रालय बाहेक सबै मन्त्रालय र ती मातहतका कार्यालयका कर्मचारीहरुको तलब बक्यौता रहेको छ । अर्थमन्त्रालयका कर्मचारीहरु समेत तलब खान सकेको छैन । जे जति भनेपनि कर्मचारी र प्रदेश सभा सदस्यले तलब नपाउनुको मुख्य कारण मुख्यमन्त्री र अर्थमन्त्रीबिचको द्वन्द्व रहेको बुझिएको छ ।
यसैबीच करारमा कार्यरत कर्मचारीहरुले अर्थ मन्त्रालयमा तालाबन्दी समेत गरेका छन् । तलब बक्यौता रहेको अवस्थामा आफूहरुलाई मन्त्री संजय यादवले हटाउन लागेको भनी तालाबन्दी गरेको करारमा कार्यरत कर्मचारीहरुले बताएका छन् । कार्यालय सहयोगी र चालक सहितका करारमा कार्यरत कर्मचारीहरुलाई हटाउने उद्देश्यले मन्त्री यादवले करारको मिति गएको साउनदेखि थप गरेको छैन ।
यस सम्बन्धमा अर्थमन्त्री संजय यादव र सचिव प्रेम प्रसाद भट्टराईसँग प्रतिक्रिया लिन खोज्दा मोबाइलको स्वीच अफ रहेको कारण सम्पर्क हुन सकेन । अर्थमन्त्रालयका सचिव लेखा अधिकृत विजय चौधरीले भने रकम निकासा गर्ने ईप्रविधिको सफ्टवेयर लिंक हुन नसक्दा तलब पठाउन नसकिएको हो । सम्बन्धित मन्त्रालयहरुमा रकम पठाउने काम जारी रहेको छ । तर चाँडै नै अब सबै निकायमा रकम निकासा भइ हाल्ने बताए ।
यसैबीच मधेश प्रदेश सरकारका अर्थ मन्त्रालयमा कर्मचारीहरुले तालाबन्दी समेत गरेका छन् । तलब बक्यौता रहेको अवस्थामा मन्त्री संजय यादवले करारका कार्यरत कर्मचारीहरुलाई हटाउन लागेकोमा आक्रोशित कर्मचारीहरुले बुधवार अर्थमन्त्रालयमा तालाबन्दी गरेका हुन् । उनीहरुले करारको अवधि थप र बक्यौता तलबको माग गर्दै तालाबन्दी गरेको बताइएको छ । कार्यालय सहयोगी र चालक सहितका करारमा कार्यरत कर्मचारीहरुको मन्त्रालयले करारको मिति गएको साउनदेखि थप गरेको छैन । उनीहरुले के कति कारणले हटाउन लागेको हो भन्ने कुराको आफूहरुलाई स्पष्ट जवाफ नदिई अर्थमन्त्री भाग्ने गरेको पीडा पोखे ।
यो विषयमा आफ्नो प्रतिक्रिया दिनुहोस् !