जनकपुरधाम, २५ साउन ।
क्षमता अभिवृद्धिका लागि मधेश प्रदेश सभाका महिला र सीमान्तकृत सांसदहरुलाई समुहगत मार्गदर्शन (मोनेटरिङ्ग) गरिएको छ ।
वर्तमान सांसदहरुलाई मेन्टरका रुपमा रहेका पूर्व सांसदहरुले प्रदेश सभामा सांसदहरुको जनता र सरकारप्रतिको दायित्व बारे मधेश प्रदेश सभाको समन्वय र यूएनडीपी संसदीय परियोजनाको सहयोगमा सीआईसीद्वारा आयोजित मोनेटरिङ्ग कार्यक्रम अन्तर्गत मागदर्शन गराइएकाे हाे ।
मेन्टरमा रूपमा रहेका पूर्व सांसद सुन्दर बहादुर विश्वकर्माले सांसदहरुको संसदमा काम कर्तव्य के हो बारे जानकारी गराएका थिए । उनले हामी सांसदले विधेयकमा संशोधन प्रस्ताव दर्ता गराउन सक्ने, पार्टीबाट अवसर नपाएपनि शून्य समयमा जनताको आवश्यकताका कुरा बारे आवाज उठाउन सक्ने, विधेयकमा असहमति जनाउन सक्ने लगायतका कुरा गर्न सक्ने बताएका थिए ।
त्यस्तै अर्का पूर्व सांसद जगतप्रसाद यादवले प्रदेश सभामा सांसदको जनता र सरकारप्रति जिम्मेवारी के हो, जनताका लागि नेता कसरी बन्न सक्छौ भन्ने बारे सहभागी वर्तमान सांसदहरुलाई सम्झाएका थिए । उनले हामी आफ्नो लागि होइन जनताले सहजबाट जीवन व्यक्ति गर्न पाउन र उनीहरुको हकहित तथा संरक्षणका लागि बाटो कोरिदिने प्रतिनिधिको रुपमा कानून निर्माणका लागिका निर्वाचित भएकाले आ आफ्नो जिम्मेवारी वहन गरेमा राजनीतिमा दिर्घकालिन रुपमा टिक्न सक्छौं नत्र त्यसपछि जनताले अवसर नदिने पर्याप्त उदाहरण रहेको बताएका थिए ।
कार्यक्रममा उपस्थित अधिवक्ता मनोज यादवले प्रदेश सभा, प्रदेश सांसद र प्रदेश सरकारको काम कर्तव्यको संवैधानिक व्यवस्था बारे जानकारी गराएका थिए । उनले संविधानमा प्रदेश सभाको एकल अधिकार सूची र साझा अधिकार सूची सहित बारे जानकारी गराएका थिए ।
कार्यक्रममा सहभागी महिला तथा सीमान्तकृत सांसदहरुले आफूहरुले संसदमा बोल्न पाउने अवसर कसरी पाउने, के को विषयमा बोल्ने र अवसर नपाएका सांसदले हाउसमा कुन समयमा आफ्ना कुरा राख्न पाउने भन्ने जिज्ञासा राखेका थिए । कार्यक्रममा यूएनडीपीका बिटु श्रीवास्तवले कार्यक्रमको उद्देश्य बारे प्रकाश पारेका थिए ।
सक्षम सांसद बन्नका लागि आवश्यक पर्ने क्षमता र दक्षता (संसदीय कार्यविधि, कार्यहरू र तिनीहरूको भूमिका, आदिमा केन्द्रित भएर) बारे क्षमता बढाउने, सदन र संसदीय समितिहरूमा प्रभावकारी सांसदको रूपमा काम गर्नका लागि सदस्यहरूलाई सहयोग र मागदर्शन गर्ने कार्यक्रमको उद्देश्य रहेको श्रीवास्तवले जनाएको थियो ।
यूएनडीपीको सहयोगमा प्रदेश सभाले वर्तमान महिला तथा सीमान्तकृत सांसदहरुको क्षमता अभिवृद्धिका लागि कार्यक्रम संचालन गर्दै आएको छ । समूहगत रुपमा एक अर्काबीच छलफल गराई क्षमता अभिवृद्धि गराउने कार्यक्रमलाई निरन्तरता दिदैं आएको छ ।
यो विषयमा आफ्नो प्रतिक्रिया दिनुहोस् !