जनकपुरधाम, असार १० गते । काजबाट हटाएर सरकारले अन्याय गरेको भन्दै अतिरिक्त हुलाक कार्यालय खारेजको निर्णय फिर्ताको माग गर्दै अतिरिक्त हुलाक कार्यालयका कर्मचारीहरु आन्दोलनमा उत्रेका छन् ।
आर्थिक वर्ष २०८०/०८१ को बजेटमा अतिरिक्त हुलाक कार्यालय खारेजको निर्णय सरकारले न्यायपूर्ण व्यवहार नगरेको भन्दै तिनीहरु जनकपुरधाम स्थित हुलाक कार्यालयमा तालाबन्दी गरी गत असार ५ गतेदेखि नै आन्दोलनमा छन् ।
नेपाल अतिरिक्त हुलाक कर्मचारी एसोसिएसनको अगुवाइमा उनीहरुले जिल्ला हुलाक कार्यालय अगाडि धर्नामा बसेका छन् । अतिरिक्त हुलाक कार्यालयका कर्मचारीहरु विभिन्न ४ वटा माग अगाडी सारेका छन् । अतिरिक्त हुलाक कर्मचारी एसोसिएसन धनुषाको बिरोध कार्यक्रमका संयोजक जिल्ला अध्यक्ष प्रदीप कुमार यादवले आफूहरुलाई सरकारले व्यवस्थापन नगरेसम्म आन्दोलन जारी रहने चेतावनी दिए ।
अतिरिक्त हुलाक खारेजको निर्णय तत्काल फिर्ता गर्न, अतिरिक्त हुलाकमा लामो समयदेखि कार्यरत कर्मचारीहरुको रोजगारी नखोस्न, हुलाकको संरचना खारेज होइन यसको सेवाको पुनःसंरचना गर्न र राजीनामा दिइ सेवाबाट नियमित रुपमा अवकाश भएका वा हुने कर्मचारीहरुको सेवा अवधि तथा सेवा सुविधा सुनिश्चित गर्नुपर्ने उनीहरुको माग रहेको छ ।
अतिरिक्त हुलाक, इलाका हुलाक तथा जिल्ला हुलाक कार्यालयहरुमा माग पूरा नभएसम्म प्रदर्शनका साथै कामकाज ठप्प पारी तालाबन्दी जारी राख्ने गर्ने अतिरिक्त हुलाक कर्मचारी एसोसिएसन धनुषाका अध्यक्ष दिनेश यादवले बताए ।
आन्दोलनरत पक्षले गरेको आन्दोलनका कारण कामकाजमा प्रभाव परेको हुलाक कार्यालय धनुषाका प्रमुख साहले बताए । उनले भने उनीहरुको आन्दोलन ५ गतेदेखि रहेपनि कार्यालयका काम शुक्रवारदेखि प्रभावित रहेको छ ।
उनीहरुले अतिरिक्त हुलाक कार्यालयका साथै हुलाक कार्यालयले प्रदान गर्ने सबै सेवा बन्द गरेर हुलाक कार्यालय परिसरमै तालाबन्दी गरी आन्दोलनरत छन् । धनुषामा धनुषामा ७५ वटा अतिरिक्त हुलाक कार्यालयमा २ सय ७५ जना कर्मचारी कार्यरत छन् ।
यो विषयमा आफ्नो प्रतिक्रिया दिनुहोस् !