जनकपुरधाम, फागुन १६ गते । जनकपुरधाम उपमहानगरपालिकाको लापरवाहीले ७ वर्षमा पनि जानकी मन्दिर अगाडि रहेको तेलहा—मडहा पोखरीको सौन्दर्यीकरणको काम पुरा हुन नसकेको छैन ।
मधेश प्रदेशका राजधानी समेत रहेकाे जनकपुरधाम १० स्थित साे पाेखरीकाे एक वर्षमा सम्पन्न गर्ने गरी ठेक्का लागेको सो पोखरीको सौन्दर्यीकरणको काम २०७३ भदाै २५ मा ठेक्का लागेकाे थियाे । तर ६/६ पटक म्याद थप भएपनि जनकपुरधाम उपमहानगरपालिकाको लापरवाहीले पुरा हुन सकेको छैन ।
हालको संघीय आयोजना कार्यान्वयन इकाईले तेलहा र मडहा ती दुवै पोखरीको सौन्दर्यकरणको काम ९५ प्रतिशत सम्पन्न भएपनि जनकपुरधाम उपमहानगरपालिकाको कारण ५ प्रतिशत काम पुरा हुन सकेको छैन । जनकपुरधाम उपमहानगरले पोखरीको जग्गा अतिक्रमण गरी बनाईएका संरचना र टहरा हटाउन नसक्दा केही भागमा ईटा जोडाई, फ्लामको फ्रेन्चिङ्ग र रिटेरिङ्ग वालको काम बांकी रहेको जनाइएकाे छ ।
संघीय आयोजना कार्यान्वयन इकाईका प्रमुख प्रदीप खनालले मडाहा पोखरीको घाट निर्माण र तेलहा पोखरीको तिन तिर रिटेलिङ्ग वाल र दक्षिणपट्टी घाट निर्माण सहित ९५ प्रतिशत काम सम्पन्न भइसकेकाे छ । तर उपमहानगरपालिकाले नक्सा बमोजिम सीमांकन गरिएका पोखरीको जग्गामा निर्मित संरचना र अस्थायी संरचना हटाउन नसक्दा निर्माण गर्न नसकिएकाे बताए ।
उनले भने मडहा पोखरीमा नालाको काम, तेलहा पोखरीको पुर्व र पश्चिमपट्टी सीमांकन गरिएको क्षेत्रफल भित्र जग्गा अतिक्रमण गरी निर्माण गरिएको घर तथा भवन लगायतका संरचना र पोखरी घाटमा मन्दिरका लागि राखिएका प्रसाद र फलफूल लगायतका ठेला र टहरा सहितका अस्थायी संरचना उपमहानगरले हटाउन नसक्दा ८५ घन मीटर ईटा जोडाई, ३५ सय केजी फ्लामको फ्रेन्चिङ्ग र २५० मीटर स्टीलको रिटेरिङ्ग वालको निर्माण काम, प्लास्टर र रंगरोगन लगायतका काम बांकी रहेको छ ।
सुगम कमल सुगम जेभी कन्स्ट्रक्सन कम्पनीले तात्कालिन शहरी विकास तथा भवन निर्माण कार्यालयबाट पाएकाे ठेक्काकाे ६/६ पटक म्याद थप भईसकेको छ, आउंदो चैत मसान्तसम्म अन्तिम पटकका लागि म्याद थप गरिएको हो । यस पटक सम्पन्न भएन भने निर्माण कम्पनीको ठेक्का नै हुनेछ । एक करोड ३७ लाख २९ हजार रुपैयाँमा लागेको ठेक्कामा अहिलेसम्म १ करोड १८ लाख ४२ हजार रुपैयाँ खर्च भइसकेपनि काम भने अधुरै छ ।
प्रमुख खनालले भने अतिक्रमित संरचना हटाउनुका साथै दुवै पोखरीको सरसफाई गर्न उपहानगरलाई पटक पटक ताकेता गर्दा पछिल्लो पटक अस्थायी संरचना हटाउन माघ २० मा ७ दिने सूचना प्रकाशित गरेको थियो । तर हालसम्म ती संरचनाहरु हटाइएको छैन ।
जनकपुरधाम १० काे कि.नं. ११७ को २ कट्ठा, कि.नं. १३५ को मडहा पोखरी र कि.नं. १६३ को तेलहा पोखरीको ५ धुर जमीन बिक्री, जसमा संरचना निर्माण भई पसल सञ्चालनमा रहेका छन भने तेलहाको पूर्वपट्टी जग्गा अतिक्रमण भई घर सहितका स्थायी संरचना नै निर्माण भइसेकेका छन र पश्चिमपट्टी मन्दिर र उपमहानगरको मिलोमतोमा फलफूल र प्रसाद सामाग्री वितरणका लागि जग्गा भाडामा लगाइएको छ ।
गैर जिम्मेवार जनप्रतिनिधि
यस सम्बन्धमा जनकपुरधाम उपमहानगरपालिकाका मेयर मनोज साहलाई फोन गर्दा दिनभरि उनको मोबाइल स्वीच अफ नै थियो र प्रमुख प्रशासकीय अधिकृत रत्नेश शशीलाई पटक पटक फोन गर्दा उठाएनन् ।
गत कात्तिक २ गतेका दिन पोखरी सरसफाईको विषयलाई लिएर स्थानीय युवा र प्रहरीबीच झडप समेत भएको थियो । सो झडपमा ३ जना घाइते भएका थिए भने ९ युवा पक्राउ परेका थिए ।
त्यस बेला उपमहानगरपालिकाका मेयर मनोज साहले ती पोखरीको सौन्दर्यकरणको काम संघीय सरकारबाट शहरी विकास तथा भवन निर्माण कार्यालयबाट भइरहेकोले हामीले त्यसमा केही गर्न नसक्ने भनी अभिव्यक्ति दिएका थिए ।
उनले अभिव्यक्ति दिएको ४ महिनापछि उपमहानगरपालिकाले पोखरीको डिल अतिक्रमण गरी बनाइएका घर, पसल र ठेला लगायतका स्थायी एवं अस्थायी खाली गर्न भनी माघ २० गतेका दिन ७ दिने सूचना जारी गरेको थियो । सूचनाको म्याद सकिएको तेश्रो साता बित्न लाग्दा पनि उपमहानगरपालिकाले पोखरीको डिल अतिक्रमण गरी बनाइएका संरचनाहरु हटाउन सकेका छैनन भने पोखरीको फोहोर समेत सरसफाई गर्न सकेको छैन ।
प्रदेशका लागि भ्रष्टाचारको अखाडा
वर्षौदेखि सौन्दर्यीकरणको पखाईमा रहेका ती दुवै पोखरी संघदेखि प्रदेशसम्म भ्रष्टाचारको अखाडा बनेको छ । दुवै पोखरी सौन्दर्यकरणको लागि संघीय सरकारबाट २०७१ सालमा समेत गरी दुई/दुई पटक ४० लाख निकासा गरियो तर हालसम्म त्यस बजेटबाट के कति काम भयो त्यसको अतोपतो छैन ।
प्रदेश सरकारले समेत एक पटक ४० लाख र त्यसपछि गत आर्थिक वर्ष २०७८/०७९ मा डेढ करोड रुपैया ती पोखरीहरुको सौन्दर्यीकरणको लागि बजेट छुटयायो तर के काम भयो त्यसको अतोपतो छैन । संघीय सरकारबाट ठेक्का लागिसकेका योजनामा प्रदेश सरकारले बजेट निकासा गर्नुको कुनै औचित्य नभई कागजमा काम सम्पन्न गरेर रकम भ्रष्टाचार गर्ने उद्देश्य रहेको आरोप लाग्दै आएको छ । साभार : ईकागज
यो विषयमा आफ्नो प्रतिक्रिया दिनुहोस् !