काठमाडौ, वैशाख २९ गते । प्रहरीले म्याग्दीको बेनी नगरपालिका १ रत्नेचौरको सिमबाट ढुंगा प्रहार गरी आफ्नै बुबाको हत्या गरेको आरोपमा एक जनालाई पक्राउ गरेको छ ।
गएको शनिबार राति १० बजे बेनी नगरपालिका १ रत्नेचौरका २९ वर्षीय कुमार थापा मगरले आफ्नै बुबा ५१ वर्षीय मीनबहादुरलाई टाउकामा ढुंगा प्रहार गरेर सख्त घाइते बनाएको थियो र उपचारको क्रममा आइतवार उनको पोखरामा मृत्यु भएको छ ।
जिल्ला प्रहरी कार्यालय म्याग्दीका प्रहरी नायब उपरीक्षक किरणजङ्ग कुँवरले बुबाको हत्यापछि छोरा कुमारलाई प्रहरीले पक्राउ गरेको हो ।
छोराको ढुंगा प्रहारबाट अचेत भएका मीनबहादुरलाई बेनी अस्पतालमा उपचार सम्भव नभएपछि पोखराको मणिपाल अस्पतालमा सिफारिस गरिएको थियो ।
अभियुक्त कुमारले पटकपटक बुबालाई आफ्नो इच्छानुसार काम नगरेको भन्दै आक्रमण गर्ने गरेका स्थानीयले बताएका छन् । घटनास्थलमै अभियुक्त कुमारले आफूले ढुंगा प्रहार गरेको स्वीकारसमेत गरेका प्रहरीले जनाएको छ।
यो विषयमा आफ्नो प्रतिक्रिया दिनुहोस् !