लोक समाचारदाता
काठमाडौ, फागुन २१ गते ।
मंगलवार राजीनामा दिएका डा. युवराज खतिवडालाई २४ घण्टा नबित्दै पुनः अर्थमन्त्री र सूचना तथा संचार मन्त्रीमा नियुक्त गरिएको छ ।
बुधवार बिहान मिर्गाैला प्रत्यारोपणका लागि त्रिवि शिक्षण अस्पताल (महाराजगन्ज) मा रहेका प्रधानमन्त्री ओलीले अप्रेसन थिएटरमा पस्नुअघि डा. युवराज खतिवडालाई दुवै मन्त्रालयको पद सम्भाल्ने गरी नियुक्त गरेका हुन ।
गोकुल बास्कोटा भ्रष्टाचार आरोपमा तानिएपछि डा. खतिवडालाई नै सूचना तथा संचार मन्त्रीको जिम्मेवारी दिइएको थियो ।
मुख्य सचिव लोकदर्शन रेग्मीले प्रधानमन्त्री ओलीका तर्फबाट खतिवडालाई मन्त्री पदमा पुनः नियुक्तिका लागि राष्ट्रपतिसमक्ष सिफारिस गरिएको प्रधानमन्त्रीको सचिवालयले जनाएको छ । त्यसका लागि मुख्य सचिव रेग्मी प्रधानमन्त्रीलाई भेट्न त्रिवि शिक्षण अस्पताल नै पुगेका थिए ।
प्रधानमन्त्री ओलीको सिफारिसमा राष्ट्रपति विद्यादेवी भण्डारीले खतिवडालाई पुनः अर्थ र सञ्चार तथा सूचना प्रविधिमन्त्रीमा नियुक्त गरेको राष्ट्रपति कार्यालयले जनाएको छ । खतिवडाले आजै अपराह्न ४ बजे राष्ट्रपति भवन शीतल निवासमा पद तथा गोपनीयताको सपथग्रहण गर्ने कार्यक्रम छ ।
यो विषयमा आफ्नो प्रतिक्रिया दिनुहोस् !