लोक समाचारदाता
जनकपुरधाम, माघ २२ गते ।
सशस्त्र प्रहरी धनुषाले चालू आर्थिक वर्षमा करीब ४० करोड रुपैया बराबरको राजश्व संकलन गरेको छ ।
सशस्त्र प्रहरी बल नेपाल नं. ८ गण हेडक्वाटर धनुषाले एक पत्रकार सम्मेलन आयोजना गरी चालू आर्थिक वर्षको ६ महिनाको अवधिमा लक्ष्यभन्दा तेब्बर राजश्व संकलन गरेको दाबी गरेको छ ।
सशस्त्र प्रहरी धनुषाका प्रहरी उपरिक्षक राजेश उप्रेतीका अनुसार चालू आर्थिक वर्षमा १३ करोड ३९ लाख १५ हजार ८ सय ५ रुपैया अनुमानित गरिएको थियो तर त्यो भन्दा तेब्बर ३९ करोड ८७ लाख ४ हजार ४ सय ६८ रुपैया राजश्व संकलन गरिएको हो ।
शसस्त्र प्रहरीले चालु आर्थिक वर्षमा सीमावर्ती क्षेत्रबाट गत आर्थिक वर्षभन्दा चौगुणा अवैध सामाग्री बरामद गरेको छ । सशस्त्र प्रहरीका अनुसार चालु आर्थिक वर्षमा २ करोड ८१ लाख ९३ हजार ४ सय ७३ रुपैया बराबरको अवैध सामाग्री समेत बरामद गरेको छ । गत आर्थिक वर्षमा ५५ लाख ३३ हजार ४ सय ६५ रुपैया बराबरको मात्र सामाग्री बरामद गरिएको थियो ।
राजश्व संकलन र अवैध सामाग्री बरामदका साथै सशस्त्र प्रहरीले अवैध हतियार राखेको आरोपमा एक व्यक्ति र दुईथान हतियार बरामद गरेको छ भने चितुवाको छाला र पुच्छर सहित ३ जनालाई नियन्त्रणमा लिई काराहीका लागि सम्बन्धित निकायमा पठाएको प्रहरी उपरिक्षक उप्रेतीले पत्रकार सम्मेलनमा जारी गरिएको प्रेस विज्ञप्तिमा जनाइएको छ ।
त्यसैगरी ५० करोड ६४ लाख ८१ हजार मूल्य बराबरको अवैध सुनचाँदी र त्यसमा प्रयोग हुने २ लाख ५९ हजार मूल्य बराबरको मोटरसाइकल र साइकल समेत सशस्त्र प्रहरी बरामद गरी कारवाहीका लागि सम्बन्धित निकायको पठाएको छ ।
यसका साथै लागू औषध बरामद र गाँजा फँडानी पनि जिल्लाका विभिन्न स्थानमा व्यापक रुपमा गरिएको उप्रेतीले जनाएको छ ।
यो विषयमा आफ्नो प्रतिक्रिया दिनुहोस् !