लोक समाचारदाता
जनकपुरधाम, माघ ६ गते ।
धनुषाको नगराईन नगरपालिकाका नगर प्रमुख भ्रष्टाचार गरेको ठहर गर्दैै विकास निर्माण योजनाको पारदर्शीको मांग सहित नेपाल कम्यूनिष्ट पार्टी (नेकपा) बाट निर्वाचित वडाअध्यक्षहरु आन्दोलनमा उत्रेका छन ।
सोमवार एक पत्रकार सम्मेलन आयोजना गरी वडाध्यक्षहरुले स्थानीय सरकार सञ्चालन ऐन २०७४ बमोजिम कुनै काम नै नगरी नगरमा हुने बिकास निर्माणका कार्यहरुमा व्यापक भ्रष्टाचार भएको आरोप लगाएका छन । ती योजनाहरु सार्वजनिक रुपमा पारदर्शी गर्न पटक पटक मांग गर्दा कुनै चासो नदिएको भन्दै आन्दोलनमा उत्रेको उनीहरुको भनाई छ ।
मेयर यादवले नगरसभाबाट पास नै नगरी वडा नम्बर ८ अकौरास्थित ठाकुर पोखरीको घाट निर्माणमा ५० लाख,वडा नम्बर–३ मा २५ लाख र वडा नम्बर–९ मा २५ लाख गरि जम्मा १ करोड रुपैयाँमा व्यापक भ्रष्टाचार गरेको वडा नम्बर ५ का अध्यक्ष संजय कुमार राउतले भने ।
आर्थिक बर्ष २०७६/०७७ को तेश्रो नगरसभाबाट पारित भएको वडास्तरिय योजनालाई कार्यपालिका बैठकको बहुमतबाट संशोधनको निर्णय गर्न नपाउने तथा २०७६÷०७७ को चौथो नगरसभाबाट अनुमोदन गराउन नपाउने साथै नगरसभाबाट पारित भएको वडास्तरीय योजनालाई कार्यान्वयन गर्नबाट रोक्न नपाउने,वडा भित्र पर्ने जुनसुकै योजना वडा समितिद्धारा उपभोक्ता समिति गठन भई सञ्चालन गराई कार्य सम्पन्न प्रतिवेदन वडाबाट हुनुपर्ने उनीहरुको मांग रहेको छ ।
त्यस्तै वडा भित्र पर्ने योजनालाई नगरपालिकाबाट उपभोक्ता समिति गठन गरि सञ्चालन गर्न नपाउने तथा सम्पन्न प्रतिवेदनद्धारा भुक्तानी गर्न नपाउने,प्रधानमन्त्री स्वरोजगार कार्यक्रमलाई परिवर्तन गरि मेयर स्वरोजगार कार्यक्रम नामाकरण गरि काम गर्न नपाउने लगायतका १८ बुँदे मागहरु नेकपाका वडाध्यक्षहरुले अघि सारेका हुन् ।
मेयर यादवले आर्थिक बर्ष २०७४÷०७५ को खानेपानी ह्याण्ड पाईपको बजेटलाई ०७५/०७६ मा खर्च गर्न नमिल्ने भएपनि सो रकम मनोमानी ढंगले खर्च गरि सम्बन्धित वडालाई कुनै जानकारी नै नदिई भ्रष्टाचार गरेको वडा नम्बर ४ का अध्यक्ष अमिरीलाल राउतले भने ।
ती वडाध्यक्षहरुले आफूहरुको मांग पुरा नभएसम्म शान्तिपुर्ण आन्दोलन जारी रहनेछ । त्यसमा पनि प्रमुखले लिखित रुपमा वार्ताको माध्यमबाट मांग सम्बोधन नगरे तालाबन्दी लगायतका आन्दोलनको कार्यक्रम दोश्रो चरणमा गर्ने चेतावनी दिए ।
नगराइन नगरपालिकामा मेयर परमेश्वर यादव,उपमेयर रञ्जु कुमारी साह र ५ जना वडाअध्यक्ष नेपाली काँग्रेसबाट निर्वा्चित भएका छन् भने वडा नं. ४ का अमिरी लाल राउत, वडा नं. ५ का संजय कुमार राउत, वडा नं. ६ का प्रमोद साह र वडा नं. ७ का अध्यक्ष रामदुलार मुखिया नेपाल कम्यूनिष्ट पार्टी (नेकपा) बाट रहेका छन ।
यो विषयमा आफ्नो प्रतिक्रिया दिनुहोस् !