लोक समाचारदाता
जनकपुरधाम, माघ ५ गते ।
धनुषाको जनकनन्दनी गाउँपालिका १ ईनर्वामा सशस्त्र प्रहरीको बोर्डर आउट पोष्ट कार्यालयको विधिवत रुपमा स्थापना गरिएको छ ।
आइतवार एक समारोहका बीच ईनर्वा स्थित रेल तथा मेट्रो विकास भवनमा रहेको सो बोर्डर आउट पोष्ट कार्यालयको उद्घटन सशस्त्र प्रहरी बल नेपाल नं. २ छिन्नमस्ता वाहिनी मुख्यालय महोत्तरीका वाहिनीपति सशस्त्र प्रहरी नायब महानिरिक्षक राजु अर्यालले उद्घाटन गरेका हुन ।
सशस्त्र प्रहरी निरिक्षकको कमाण्ड रहने गरी स्थापना गरिएको सो बोर्डर आउट पोष्टले जिल्लाको दक्षिणपुर्वी भारतीय सीमा तथा पुर्वमा कमला नदीसम्मका करीब ४ हजार आम नागरिकलाई शान्ति सुरक्षा कायम गर्न काम गर्नेछ ।
उद्घाटन कार्यक्रमलाई सम्बोधन गर्दै सशस्त्र प्रहरी नायब महानिरिक्षक अर्यालले भने यस बोर्डर आउट पोष्टले भारतीय सीमानाका सहित कमला नदीसम्मका जनतालाई शान्ति सुरक्षाको प्रत्याभुति गराउनुका साथै बाढीको प्रकोप बढी हुने क्षेत्र भएकोले विपद् उद्धारमा सहयोग पुरयाउन निर्देशन दिए ।
उनले सुरक्षाका साथै बिओपीमा काम गर्ने सशस्त्र प्रहरी कर्मचारीहरुलाई अनुशासित एवं इमान्दार भई काम गर्न निर्देशन समेत दिए ।
कार्यक्रममा सशस्त्र प्रहरी बल नेपाल नं. ८ गण हेडक्वाटर धनुषाका गणपति शसस्त्र प्रहरी उपरिक्षक राजेश उप्रेतीले सो बिओपी कार्यालयको स्थापनाको उद्देश्यमाथि प्रकाश पारेका थिए ।
कार्यक्रममा उपस्थित जनकनन्दनी १ का वडाध्यक्ष धमेन्द्र गोइतले बिओपीको श्रोत साधन व्यवस्थापन गर्न स्थानीय स्तरबाट सक्दो सहयोग गर्ने प्रतिबद्धता जनाए ।
यो विषयमा आफ्नो प्रतिक्रिया दिनुहोस् !