लोक समाचारदाता
जनकपुरधाम, पुस २६ गते ।
अवैध बालुवा गिट्टी उत्खनन रोक्न पुगेका युवक धनुषाका मिथिला नगरपालिका ५ श्रीपुर निवासी ओमप्रकाश भन्ने दिलिपकुमार महतोलाई टिपरबाट किचेर हत्या गराएको आरोपमा उद्योगी विपिन महतोलाई प्रहरीले पक्राउ गरेको छ ।
शुक्रबार एकाबिहानै ४ बजेको समयमा औरही खोलामा बालुवा गिट्टीको अवैध उत्खनन गर्न पुगेका ओमप्रकाशको ना ७ ख ६४१३ नम्बरको टिपरले किचेर हत्या गराइएको थियो ।
मृतकका आफन्तजन र स्थानीयको आरोपमा धनुषा प्रहरीले फरार रहेका ढल्केवर स्थित चुरियामाई बालुवा गिट्टी प्रशोधन केन्द्रका संचालक विपिन महतोलाई शनिवार करीब बिहान १० बजे जनकपुरधाम १ भानु चौकबाट पक्राउ गरेको हो ।
घटना लगतै प्रहरीले टिपर नियन्त्रणमा लिएको थियो भने दिउंसो करीब १ बजेतिर नै टिपर चालक मुनिन्द्र महतोलाई पक्राउ गरिसकेको थियो । घटनाको विरोधमा मृतकका आफन्त र स्थानीयले दोषीमाथि तत्काल कारवाहीको मांग गर्दै पुर्व पश्चिम राजमार्ग अवरुद्ध गरी विरोध प्रदर्शन गरेका थिए ।
अवस्था तनावग्रस्त भएपछि प्रहरीले लाठी चार्ज र दर्जनौ राउण्ड आश्रुग्यास समेत प्रहार गर्नु परेको थियो । स्थानीयको प्रदर्शनले शुक्रवार दिउंसो ३ बजेसम्म यातायात अवरुद्ध रहेको थियो ।
घटना यसरी भएको थियो
ओमप्रकाशका भाई रजनीश महतोका अनुसार ओमप्रकाशका साथी रोशन यादवले एका बिहानै ४ बजेतिर एक टिपरले अवैध बालुवा गिट्टी उत्खनन गरिरहेको छ भनी फोन गरेपछि उनी त्यही बेला घरबाट अवैध उत्खनन रोक्न औरही खोलाका लागि निस्किए । घरबाट निस्केको केहीबेरमै रोशनले नै फोन गरेर घरमा भन्यो ओमप्रकाशको हत्या भइसकेको छ ।
रोशनको फोन लगतै घरका आफन्तजन र वडाध्यक्ष श्यामबाबु यादव घटनास्थलमा पुगेका थिए । त्यस लगतै प्रहरी पनि पुगे, तर प्रहरीले बिना मुचुल्काकै शव पोष्टमार्टमका लागि प्रादेशिक अस्पताल जनकपुर पठाइ दिए । प्रहरीको यस्तो क्रियाकलापले घटनामा प्रहरीको पनि संलग्नता रहेको भनी झन आक्रोशित भए । शवको प्रकृति हेर्दा कुटपिट गरी टिपरबाट किचिएको देखिएको स्थानीइको भनाई ।
ओमप्रकाशलाई कुटपिट गरी टिपरले कुल्चेर हत्या गर्नु र बिना मुचुल्का कै शव पोष्टमार्टमका लागि अस्पताल पठाउनु भनेको नियोजित घटना रहेको आरोप स्थानीयको रहेको छ । हुनत घटनास्थलमा अवैध उत्खनन रोक्न दुवै साथी संगै पुगेका थिए तर रोशन भाग्न सफल भयो, ओमप्रकाशलाई ज्यान गुमाउनु परयो । रोशन पनि हाल अनुसन्धानको क्रममा प्रहरी नियन्त्रणमा रहेको छ ।
घटना पश्चात ओमप्रकाशकी आमा चन्द्रकला देवी अहिलेसम्म बेहोसी अवस्थामै छिन । छोरालाई ईन्जिनीयर बनाउने सपना देखेका बुवा दिलिप पनि स्तब्ध छन । परिवारका कुनैपनि सदस्य बोल्न सक्ने अवस्थामा छैन ।
धम्की पछि हत्या
विगत ५ वर्षदेखि समाजमा रहेका बेथिति बिरुद्ध आवाज उठाउने अभियानीको रुपमा परिचित रहेका ओमप्रकाश बालुवा गिट्टीको अवैध उत्खननको अभियान नै चलाएको थियो । सो अभियान क्रसर उद्योगीहरुका लागि आँखाको कसिंगर बनेपछि आफ्नो सहजताका लागि हत्या गरिएको ओमप्रकाशकी बहिनी लक्ष्मीले संचारकर्मी सँग कुरा गर्दै भनिन ।
उनका अनसार बालुवा गिट्टी उत्खनन गरिरहंदा ओमप्रकाशले रोक्न गएको थियो । सोही क्रममा टिपर चालकले तिमी बढी अभियान न बन्न, बढी बोलिस भने मारि दिन्छु भनी सचेत गर्दै थियो । तर ओमप्रकाशले नमानेपछि टिपर चालकले उनीमाथि टिपर चलाएर हत्या गरियो ।
क्रसर उद्योगी विपिन महतोले दाई पटक पटक फोन गर्दै आएको थियो मेरो काममा अवरुद्ध नगर भनी, तर दाई आफ्नो अभियान विरुद्ध पछि हटेन । त्यसको परिणाम आज उहाँलाई ज्यान गुमाउनु परेको छ ।
उद्योगी विपिनले दिदै आएको धाक धम्की दिदै आएको बारे स्थानीय प्रशासनलाई जानकारी गराउंदै कुनै चासो लिएन, जनप्रतिनिधिहरुसँग समेत अवैध उत्खनन रोक्न दाईले दबाव दिदै आएको थियो । तर जनप्रतिनिधिहरु त्यसतर्फ सजग नभई अनाहकको काम नलाग्न सुझाव दिदै आएको थियो लक्ष्मीले भनिन् । उहाँले आफ्नो दाईको हत्या उद्योगी विपिन, स्थानीय प्रशासन, स्थानीय जनप्रतिनिधि, नगर प्रमुखको मिलिभगत रहेको आरोप लगाएकी छिन ।
यता ईलाका प्रहरी कार्यालय ढल्केवरका प्रमुख रामकुमार यादवका अनुसार पिडीत परिवारले हालसम्म जाहेरी नदिएको कारण पोष्टमार्टम हुन नसकेको छैन । मुचुल्का बिना नै किन शव उठाइयो भनी जिज्ञासामा उहाँले भने घटनाको अवस्था स्थानीयमा आक्रोशको रहेको कारण विवाद बढन जान्छ कि वडाध्यक्षकै सहमतिमा शव उठाइएको हो ।
यो विषयमा आफ्नो प्रतिक्रिया दिनुहोस् !