लोक समाचारदाता
जनकपुरधाम, पुस १३ गते ।
पुस महिनाको मध्यसम्म अत्यधिक बढेको जाडोका कारण धनुषामा एकजना महिलाको मृत्यु भएको छ भने जाडो छल्न अगेना ताप्ने क्रममा ९ जना घाइते भएको छ ।
जिल्ला प्रहरी कार्यालय धनुषाले जनाए अनुसार पुस महिनाको प्रारम्भदेखि अत्यधिक बढेको जाडो र शितलहरका कारण एक महिलाको मृत्यु र अगेना ताप्ने क्रममा ९ जना घाइते भएको जनाएको छ ।
प्रहरीका अनुसार मृत्यु हुनेमा जनकपुरधाम उप महानगरपालिका २३ बस्ने भोगि कापडको ४८ श्रीमति अनितादेवी कापड रहेकी छिन । पुस ११ गते शुक्रवारका दिन आफनै घरमा चिसोको कारण मृत्यु भएको धनुषा प्रहरीले जनाएको छ ।
पुस ४ गतेदेखि १३ गतेसम्म जाडोबाट बच्न अगेना ताप्ने क्रममा ९ घाइते भएको जिप्रका धनुषाले एक प्रेस विज्ञप्ति जारी गरी जनाएको छ । जिप्रका धनुषाका अनुसार घाइते हुनेहरुमा जनकपुरधाम उपमहानगरपालिका १८ की ४० वर्षिय रामकुमारी देवी ठाकुर, नगराईन नपा २ राघोपुरका दिलिप महराको ८ वर्षिय छोरा रकी महरा र गणेशमान चारनाथ नगरपालिका १ बिरेन्द्र बजार फुलबरियाका अबरजीत ठाकुरको १५ महिने छोरी अंकीता कुमारी ठाकुर लगायतका रहेका छन् ।
त्यस्तै मिथिला नपा ३ हरिहरपुरका ४५ कि जगदम्बा देवि महरा, धनुषाधाम नपा ५ उमाप्रेमपुरका ३० वर्षिय रीनादेवी दास, वडा नम्बर ३ की रेखादेवी मुखिया, जनकनन्दनी गाउँपालिका ५ बस्ने ३७ वर्षिय आशादेवि मण्डल, मिथिला बिहारी नपा २ पुरणदहाका वर्ष ४० की गितादेबि मण्डल र क्षिरेश्वरनाथ नपा ४ सखुवा की २२ वर्षिय पिंकिदेवि सदा पनि अगेना ताप्ने क्रममा घाइते भएकी छिन ।
घाइतेहरुको उपचार सम्पन्न भई स्वास्थ्य अवस्था समान्य भएपछि प्रहरीले सम्बन्धित परिवारलाई जिम्मा लगाइ सकिएको जिप्रका धनुषाले जनाएको छ ।
यो विषयमा आफ्नो प्रतिक्रिया दिनुहोस् !