जनकपुरधाम उपमहानगरपालिका जनप्रतिनिधिले भोगविलासितामै खर्चे करीब रु. १५ करोड

लोक समाचारदाता
जनकपुरधाम, कात्तिक ५ गते ।
प्रदेश २ का राजधानी र धार्मिक नगरको रुपमा परिचित जनकपुरधाम उपमहानगरपालिकाका जनप्रतिनिधिहरुले तलब भत्ता र अन्य सुविधाको नाममा गरेको भोग विलासितामा करीब १५ करोड रुपैया आन्तरिक श्रोतबाट खर्चेका छन् ।
संघीयताको मूल मर्म र संवैधानिक व्यवस्था अनुसार स्थानीय जनप्रतिनिधिलाई स्थानीय तहको स्थानीय स्तरमै विकास गर्न निर्वाचित गरयो । तर प्रदेश सरकारले संविधान विपरित बनाएको स्थानीय तहका पदाधिकारी तथा सदस्यहरुले पाउने सुविधाको सम्बन्धमा ऐन बनाएर पालिकाको आन्तरिक श्रोतबाट विकासको सट्टा जनप्रतिनिधिहरुको भोग विलासितामा खर्च गराएका छन् ।
सो ऐनलाई आधार बनाएर जनकपुरधाम उपमहानगरपालिकाले तलब, संचारको नाममा करीब ५ करोड र अन्य सुविधाको नाममा १० करोडभन्दा बढी रकम विकास गर्नुको सट्टा जनप्रतिनिधिहरुको भोग विलासितामा खर्चेको छ ।

तलब भत्तामा यसरी खर्चे करीब ५ करोड

स्थानीय तह जनप्रतिनिधिहरुले पाउंदै आएको पारिश्रमिक वा तलबमा सर्वोच्च अदालतले रोक लगाएपछि अहिले जल बिनाको माछा झै छटपटाउन थालेको छ । किनकी उनीहरुले तलब र संचारकै नाममा ४ करोड, ८६ लाख ९० हजार रुपैया आम जनताको उठेको कर रकमबाट खर्चेका छन् ।
ऐन अनुसार पछिल्लो निर्वाचनबाट पदस्थापित भएका जनकपुरधाम उपमहानगरका मेयरले तलबको नाममा ४१ हजार रुपैया प्रतिमहिनाको दरले अढाई वर्षमा १२ लाख ३० हजार र संचारको नाममा २ हजारको दरले ३० महिना ६० हजार रुपैया गरी जम्मा १२ लाख ९० हजार रुपैया लिएका छन् ।
त्यस्तै उपमेयरले तलब ३५ हजार र संचार २ हजार प्रति महिनाको दरले ३० महिनामा ११ लाख १० हजार, उपमहानरपालिकामा वडा नं. १६ बाहेक २५ वडा मध्ये २४ वडाका अध्यक्षहरुले २५ हजार रुपैयाको दरले तलबमा एक करोड ८० लाख र संचारको नाममा १५ लाख रुपैया लिएका छन् । वडा नं. १६ का अध्यक्षले तलब त लिएको छैन तर संचार, सवारी साधन र भत्ता लगायतका अन्य सुविधा लिंएका छन् ।
त्यसैगरी ३५ जना बोर्ड सदस्य मध्ये ५ वटा चुनाव जितेर र ३ जना मनोनित गरी ८ जना बोर्ड सदस्यले वडाध्यक्षकै सुविधा सरह तलब र संचार खर्च वापत ३० महिनामा ६२ लाख ४० हजार रुपैया लिएका छन् । त्यस्तै एक सयजना वार्ड सदस्य मध्ये ९४ जनाले ७ हजार प्रति महिनाको दरले ३० महिनामा जम्मा २ करोड ५ लाख ५० हजार रुपैया तलबको नाममा उपमहानगरपालिकाको आन्तरिक श्रोतबाट रकम लिएका छन् ।

अन्य सुविधाको नाममा १० करोड खर्च

यी त हुन तलब र संचार खर्च मात्रै गाडी सुविधा, दैनिक भ्रमण भत्ता, बैठक र विदेश भ्रमण र इन्धन वापत उपमहानगरपालिकाले १० करोड रुपैया भन्दा बढी आन्तरिक श्रोतबाट खर्चेका छन् । भोग विलासिताको रुपमा चर्चित मेयर लालकिशोर साहले डेढ करोड रुपैया भन्दा बढीको गाडी मात्र किनेका छन् । त्यसैगरी वडा अध्यक्षहरुलाई करीब २ लाख रुपैयाको दरले ५० लाखभन्दा बढी मोटरसाइकल नै खरिद गरेका छन् ।

त्यति मात्र होइन बोर्डको नियमित बैठक भत्ता वापत वर्षेणी एक करोड रुपैया भन्दा रकम खर्चदै आएका छन । ईन्धनको नाममा समेत अढाई वर्षका २ करोड भन्दा बढी रकम खर्चेका छन भने सवारी मरम्मत सम्भारमा समेत करोडौ रुपैया खर्चेका छन् । यति मात्र होइन जिल्ला बाहिरको भ्रमणको नाममा प्रतिदिन र प्रति जनप्रतिनिधिले २ हजार रुपैयाको दरले ३० महिनामा करीब एक करोड खर्चेका हुन । अन्य जनप्रतिनिधि विदेश भ्रमण त गएका छैनन तर मेयर साह अमेरिका एक पटक र भारत कयौं पटक भ्रमण गएका छन् । सो भ्रमणको नाममा समेत १ सय ७५ डलर प्रतिदिनको दरले समेत भत्ता लिएको श्रोतको भनाई छ ।