जनकपुरधाम । धनुषाको मुखियापट्टी मुसहरनिया गाउँपालिकाले वैदेशिक रोजगारीबाट फर्किएका नागरिककाे आयआर्सीजनका लागि उद्यमशीलतासँग जोड्ने अभियान अघि बढाएको छ।
गाउँपालिकाले रोजगार सेवा केन्द्रमार्फत सञ्चालित रेमी परियोजनाअन्तर्गत वैदेशिक रोजगारीबाट फर्किएका युवालाई लक्षित गरी सीपमूलक तालिम, प्रविधि हस्तान्तरण, कृषि तथा व्यवसाय प्रवद्र्धनलगायतका आयआर्जनमूलक कार्यक्रम सञ्चालन गर्दै आएका छन्।
गाउँपालिकाका अनुसार गत आर्थिक वर्षमा मात्रै विदेशबाट फर्किएका १ सय ११ जनालाई विभिन्न कृषि तथा व्यवसायिक गतिविधिमा आबद्ध गराउँदै प्रविधि र अन्य सहयोग उपलब्ध गराइएको छ।
गाउँपालिका अध्यक्ष जयकुमार यादवका अनुसार ८८ जनालाई व्यवसाय प्रवद्र्धनका लागि आवश्यक विभिन्न प्रविधि हस्तान्तरण गरिएको छ।
त्यसैगरी १० जनालाई साझेदारीमा मखान खेती तथा ३५ जनालाई केरा र कागती खेतीका लागि सहयोग गरिएको छ। गाउँपालिकाको सहयोगपछि हाल ३–३ बिघा क्षेत्रफलमा मखान तथा केरा–कागती खेती भइरहेको अध्यक्ष यादवले जानकारी दिए।
रेमी परियोजनामार्फत सञ्चालित कार्यक्रमको अवस्थाबारे जानकारी लिन गाउँपालिका कार्यालय पुगेकी मधेश प्रदेश सरकारकी श्रम, रोजगार तथा यातायातमन्त्री शारदा देवी थापालाई अध्यक्ष यादवले वैदेशिक रोजगारीबाट फर्किएका श्रमिकलाई लक्षित गरी गाउँपालिकाले सञ्चालन गरिरहेका कार्यक्रम तथा त्यसबाट प्राप्त उपलब्धिबारे जानकारी गराएका छन् ।
गाउँपालिकाले विदेशबाट फर्किएका श्रमिकलाई मात्र नभई अतिविपन्न तथा दलित परिवारलाई समेत आवासको सुविधा उपलब्ध गराउँदै आएको जनाएको छ।
अध्यक्ष यादवका अनुसार गाउँपालिकाको पहलमा हालसम्म १ सय ४० परिवारका लागि घर निर्माण भइसकेको छ। चालु आर्थिक वर्षमा थप १ सय विपन्न तथा दलित परिवारका लागि आवास निर्माण गर्ने लक्ष्य गाउँपालिकाले लिएको छ।
वैदेशिक रोजगारीका क्रममा विदेशमा बिरामी परेर स्वदेश फर्किएका नागरिकको उपचारमा समेत गाउँपालिकाले सहयोग गर्दै आएको छ। रेमी परियोजनाअन्तर्गत रहेको कोषबाट बिरामी भएका फर्किएका श्रमिकलाई उपचार खर्च उपलब्ध गराउने व्यवस्था गरिएको अध्यक्ष यादवले बताए।
त्यसैगरी वैदेशिक रोजगारीका क्रममा मृत्यु भएका स्थानीय नागरिकको शव स्वदेश ल्याउन गाउँपालिकाले सहयोग गर्दै आएको छ। मृतकका परिवारलाई राहतस्वरूप प्रतिपरिवार ५० हजार रुपैयाँका दरले आर्थिक सहयोगसमेत उपलब्ध गराउँदै आएको अध्यक्ष यादवले जानकारी दिए।
अध्यक्ष यादवले विदेशबाट फर्किएका व्यक्तिसँग केवल श्रमको अनुभव मात्र नभई विभिन्न काममा हासिल गरेको सीप, कार्यअनुशासन, व्यवसायिक ज्ञान र सम्भावित लगानीका लागि पुँजीसमेत हुने भएकाले त्यसलाई स्थानीय उत्पादनमा उपयोग गर्न गाउँपालिका केन्द्रित रहेको बताए।
उनका अनुसार विदेशमा सिकेको सीप र अनुभवलाई गाउँमै प्रयोग गर्न सक्ने वातावरण निर्माण भएमा फर्किएका श्रमिकलाई पुनः वैदेशिक रोजगारीमा जानुपर्ने बाध्यता कम गर्न सकिन्छ। त्यसैलाई ध्यानमा राखेर गाउँपालिकाले सीप विकास, व्यवसायिक तालिम, प्रविधि हस्तान्तरण र कृषि उत्पादनसँग सम्बन्धित कार्यक्रमलाई प्राथमिकता दिएको हो।
कार्यक्रमको जानकारी लिएपछि मन्त्री शारदा देवी थापाले वैदेशिक रोजगारीबाट फर्किएका नागरिकलाई उद्यमशील बनाउन आवश्यक पर्ने तालिम तथा अन्य कार्यक्रमको प्रस्ताव भदौ महिनाभित्र मन्त्रालयमा पेश गर्न गाउँपालिकालाई आग्रह गरिन्।
सो अवसरमा गाउँपालिकाकी रोजगार संयोजक सरिता साहले रेमी परियोजनाको कोषमा थप रकम र प्राविधिम तालिम आवश्यक रहेको विषयमा मन्त्रालयको ध्यानाकर्षण गराएकी थिइन्। त्यसपछि मन्त्रालयका उपसचिव धनञ्जय सिंहले चालु आर्थिक वर्षमा मन्त्रालयका तर्फबाट आवश्यक सहयोग उपलब्ध गराउने प्रतिबद्धता व्यक्त गरेका थिए।
गाउँपालिकाले आगामी दिनमा पनि वैदेशिक रोजगारीबाट फर्किएका युवाको सीप, अनुभव र पुँजीलाई स्थानीय कृषि, उत्पादन तथा व्यवसायसँग जोडेर रोजगारी र आयआर्जनका अवसर सिर्जना गर्ने जनाएको छ।
विदेशबाट फर्किएका श्रमिकलाई पुनः विदेश जानुपर्ने अवस्थाबाट रोक्दै उनीहरूलाई आफ्नै गाउँमा उद्यमी बनाउने उद्देश्यले कार्यक्रमलाई थप प्रभावकारी बनाउने गाउँपालिकाको तयारी छ।
यो विषयमा आफ्नो प्रतिक्रिया दिनुहोस् !