जनकपुरधाम । मधेश स्वास्थ्य विज्ञान प्रतिष्ठानले करार सेवामार्फत विभिन्न विभागमा विशेषज्ञ जनशक्ति नियुक्त गर्न आवेदन आह्वान गरेको छ । प्रतिष्ठानले सिटिभिएस, प्याथोलोजी, एनेस्थेसिया र मेडिकल सर्जिकल नर्सिङतर्फ गरी ६ जनाका लागि दरखास्त मागेको हो ।
प्रतिष्ठानले साउन २९ गते सार्वजनिक गरेको सूचनाअनुसार सिटिभिएस विभागमा एक, प्याथोलोजीमा दुई, एनेस्थेसियामा दुई र मेडिकल सर्जिकल नर्सिङ विभागमा एक जना जनशक्ति आवश्यक परेको छ ।
उम्मेदवारको शैक्षिक योग्यता तथा कार्यअनुभवका आधारमा रिक्त पदमा प्रोफेसर, एसोसिएट प्रोफेसर, असिस्टेन्ट प्रोफेसर वा लेक्चररका रूपमा नियुक्ति गरिने प्रतिष्ठानले जनाएको छ ।
चिकित्सा विषयतर्फ आवेदन दिने उम्मेदवारले सम्बन्धित विषयमा स्नातकोत्तर तह उत्तीर्ण गरेको हुनुका साथै सम्बन्धित परिषद्मा विशेषज्ञका रूपमा दर्ता भएको हुनुपर्नेछ । नर्सिङतर्फ भने सम्बन्धित विषयमा स्नातकोत्तर उत्तीर्ण गरी सम्बन्धित काउन्सिलमा दर्ता भएको हुनुपर्ने प्रावधान राखिएको छ ।
प्रतिष्ठानले पदअनुसार छुट्टाछुट्टै उमेर सीमा पनि निर्धारण गरेको छ । प्रोफेसर र एसोसिएट प्रोफेसरका लागि उम्मेदवारको उमेर ७० वर्षभन्दा बढी हुनु हुँदैन भने असिस्टेन्ट प्रोफेसर तथा लेक्चरर पदमा आवेदन दिन ४५ वर्ष ननाघेको हुनुपर्नेछ ।
आवेदनका लागि प्रोफेसर तथा एसोसिएट प्रोफेसर पदमा १ हजार ५ सय रुपैयाँ परीक्षा दस्तुर तोकिएको छ । यस्तै, असिस्टेन्ट प्रोफेसर र लेक्चरर पदका लागि १ हजार २ सय रुपैयाँ परीक्षा दस्तुर बुझाउनुपर्नेछ । परीक्षा दस्तुर भानु चोकस्थित लक्ष्मी सनराइज बैंकमा रहेको प्रतिष्ठानको खातामा जम्मा गर्नुपर्नेछ । बैंकमा रकम जम्मा गरेपछि प्राप्त भौचर दरखास्त फारामसँगै अनिवार्य रूपमा पेस गर्नुपर्ने प्रतिष्ठानले जनाएको छ ।
योग्यता पुगेका इच्छुक नेपाली नागरिकले सूचना प्रकाशित भएको मितिले १५ दिनभित्र आवेदन दिन सक्नेछन् । आवेदन बुझाउने अन्तिम मिति भदौ १२ गते तोकिएको छ । प्रतिष्ठानले आवश्यक विशेषज्ञ जनशक्ति करार सेवामा पदपूर्ति गर्न लागेको हो । इच्छुक उम्मेदवारले तोकिएको योग्यता, उमेर तथा दस्तुरसम्बन्धी व्यवस्था पूरा गरी निर्धारित समयभित्र आवेदन दिनुपर्नेछ ।
यो विषयमा आफ्नो प्रतिक्रिया दिनुहोस् !