जनकपुरधाम । जिल्ला अदालत धनुषाको मुख्य प्रवेशद्वारअगाडि बुधबार एक मिटरब्याज पीडित महिलाले पेट्रोल छर्केर आत्मदाहको प्रयास गरेकी छन्। जनकपुरधाम उपमहानगरपालिका–४ की फुलकुमारी रजकले आफूले न्याय नपाएको भन्दै शरीरमा पेट्रोल खन्याएर आत्मदाहको प्रयास गरेकी हुन् ।
मिटरब्याजसम्बन्धी मुद्दामा पक्राउ परेका व्यक्तिहरूको थुनछेक बहस चलिरहेका बेला पीडितहरू अदालतबाहिर नाराबाजीसहित प्रदर्शन गरिरहेका थिए । त्यही क्रममा रजकले अचानक पेट्रोल शरीरमा खन्याएपछि अदालतको सुरक्षामा खटिएका प्रहरीले तत्काल नियन्त्रणमा लिएर सम्भावित गम्भीर घटना हुनबाट रोकेका थिए ।
आत्मदाहको प्रयास गर्नुअघि रजकले आफूहरूमाथि अन्याय भएको र अदालतबाट समेत न्याय नपाएको भन्दै आक्रोश व्यक्त गरेकी थिइन् । उनले फैसला प्रक्रियामाथि प्रश्न उठाउँदै न्यायाधीशले पैसा लिएर साहुलाई उन्मुक्ति दिएको आरोपसमेत लगाएकी थिइन्। यद्यपि, उनले लगाएको उक्त आरोपको स्वतन्त्र तथा आधिकारिक पुष्टि भएको छैन ।
यसैबीच, मिटरब्याजसम्बन्धी कसुरमा पक्राउ परेका गोपाल साह, रेखा साह र हरेराम साहविरुद्ध धनुषा जिल्ला अदालतमा बुधबार थुनछेक बहस भएको छ । उनीहरूविरुद्ध परेको जाहेरीका आधारमा प्रहरीले पक्राउ गरेको जनाइएको छ। बहस चलिरहेका बेला पीडित पक्षले अदालत परिसरबाहिर प्रदर्शन गरेपछि सुरक्षाकर्मीको उपस्थिति पनि बढाइएको थियो ।
पीडितहरूले साह परिवारले ऋण लगानीका नाममा सर्वसाधारणको जग्गा रजिष्ट्रेसन गराउने, त्यस्ता जग्गा बैंकमा धितो राखेर ऋण लिने तथा बिक्री गर्नेसम्मका गतिविधि गरेको आरोप लगाउँदै आएका छन् । पीडित गोविन्द साहले दिएको जाहेरीका आधारमा साह परिवारका सदस्यहरू पक्राउ परेको उनीहरूको भनाइ छ। यी आरोप तथा घटनासम्बन्धी तथ्यहरू भने अदालतको अन्तिम निर्णयबाट पुष्टि हुन बाँकी छन् ।
रजकले आत्मदाहको प्रयास गरेपछि केही समय अदालत परिसरको वातावरण तनावपूर्ण बनेको थियो। प्रहरीले प्रदर्शनकारीहरूलाई नियन्त्रणमा राख्दै अदालतको सुरक्षा व्यवस्था थप कडा बनाएको छ ।
मिटरब्याजबाट पीडित भएको दाबी गर्नेहरू लामो समयदेखि आन्दोलनमा छन्। उनीहरूले ऋण कारोबारका नाममा भएको कथित शोषण, अनुचित ब्याज असुली र सम्पत्ति हडप्ने प्रवृत्ति रोक्न माग गर्दै आएका छन् । पीडितहरूले आफूहरूलाई न्याय दिलाउन सम्बन्धित निकायले प्रभावकारी अनुसन्धान गरी दोषीमाथि कारबाही गर्नुपर्ने तथा आफूहरूको सम्पत्ति र अधिकार संरक्षण गर्नुपर्ने मागसमेत गर्दै आएका छन् ।
यो विषयमा आफ्नो प्रतिक्रिया दिनुहोस् !