पर्व त्योहारलाई दृष्टिगरी बन्द हडताल नगर्न संघको आग्रह
लोक समाचारदाता
जनकपुरधाम, असोज २९ गते ।
राष्ट्रिय जनता पार्टी (राजपा) धनुषाले आफना सांसद प्रमोद कुमार साहको तत्काल रिहाई र बुद्ध एअर कम्पनीलाई कारवाहीको मांग गर्दै बन्द सहितका आन्दोलनको कार्यक्रम अघि सारेको छ ।
बुधवार सांझ राजपा नेपाल धनुषाले आयोजना गरेको सर्वपक्षीय अन्तरक्रियाबाट सो आन्दोलनका कार्यक्रमहरु घोषणा गरिएको हो ।
कार्यक्रममा सहभागी विभिन्न संघ संगठनको सल्लाह सुझावमा बिहीवार दिउंसो ४ बजे जनकचोकमा गृहमन्त्री रामबहादुर थापा बादल र संस्कृति, पर्यटन तथा नागरिक उड्डययन मन्त्री योगे भट्टराईको पुत्ला दहन, शुक्रबार साँझ नगरभित्र मशाल जुलुस प्रदर्शन र शनिबार धनुषा बन्द सहित आन्दोलनको कार्यक्रम घोषणा गरेको छ ।
त्यसपछि समेत सांसद साहलाई रिहाइ नगरे थप आन्दोलनको कार्यक्रम घोषणा गर्ने राजपा प्रदेश २ का प्रमुख सचेतक परमेश्वर साहले बताएका छन् ।
राजपाले सांसद साहको बिना शर्त तत्काल रिहाई गरी झुठा मुद्दा फिर्ता, जनतामैत्री सेवा नदिएका कारण बुद्ध एयरको दर्ता खारेजी र नागरिक उडडयन कार्यालय जनकपुरका प्रमुख संतोष ढकाललाई कडा कार्वाहीको माग गरेको अघि सारेको छ ।
यसैबीच जनकपुर उद्योग वाणिज्य संघले चाडपर्वको समयलाई दृष्टिगत गर्दै बन्द हडताल नगर्न आन्दोलनरत पक्ष राजपालाई आग्रह गरेको छ ।
संघका कार्यवाहक अध्यक्ष जितेन्द्र प्रसाद साह र महासचिव जितेन्द्र महासेठले बुधबार नै एक विज्ञप्ती जारी गर्दै उद्योग तथा व्यवसाय सङ्कटमा रहेकाले हालको अवस्थामा हुने बन्द हडतालले उद्योग तथा व्यवसायमा नराम्रो असर पर्ने बताउँदै चाडपर्वको समयमा बन्द हडतालका कार्यक्रमहरु नगर्न आन्दोलनरत पक्षसँग आग्रह गरेका हुन ।
यो विषयमा आफ्नो प्रतिक्रिया दिनुहोस् !