जनकपुरधाम । विद्यार्थीको सामान्य ज्ञान र बौद्धिक क्षमता विकास गर्ने उद्देश्यले जनकपुरधामस्थित न्यूभिजन रेसिडेन्सियल सेकेण्ड्री स्कूलमा हाजिरीजवाफ प्रतियोगिता आयोजना गरिएको छ।
सेवाश्रम नेपालको आयोजनामा सम्पन्न प्रतियोगितामा विद्यालयको कक्षा १० मा अध्ययनरत विद्यार्थीहरूले सहभागिता जनाएका थिए। प्रतियोगितामा उत्कृष्ट प्रदर्शन गर्ने विद्यार्थीलाई कापी, डटपेन, पेन्सिल र इरेजरलगायत शैक्षिक सामग्री प्रदान गरिएको थियो। अन्य सहभागी विद्यार्थीलाई समेत प्रोत्साहनस्वरूप डटपेनलगायतका सामग्री वितरण गरिएको आयोजकले जनाएको छ।
विद्यार्थीहरूलाई विद्यालयका संस्थापक प्रिन्सिपल विश्वलाल सिंह, सेवाश्रम नेपालका अध्यक्ष दानीकान्त झा, शिक्षक ब्रजकिशोर यादव, अवकाशप्राप्त कर्मचारी शत्रुध्न ठाकुर र पत्रकार सुभाष कर्णले शैक्षिक सामग्री प्रदान गरेका थिए।
सेवाश्रम नेपालका अध्यक्ष झाले विद्यार्थीको ज्ञान र प्रतिभा विकास गर्ने उद्देश्यले विगत तीन वर्षदेखि प्रतियोगिता सञ्चालन गर्दै आएको जानकारी दिए। उनका अनुसार सुरुमा रेडियो एफएममार्फत सञ्चालन हुँदै आएको कार्यक्रमलाई पछिल्लो समय विद्यालयस्तरमा विस्तार गरिएको हो।
अवकाशप्राप्त कर्मचारीसमेत रहेका झाले कुनै दातृ संस्थाको सहयोगबिना आफ्नै निजी लगानीमा विद्यार्थीलाई शैक्षिक सामग्री उपलब्ध गराउँदै आएको बताए। प्रतियोगिताले विद्यार्थीमा अतिरिक्त ज्ञान हासिल गर्ने रुचि बढाउनुका साथै अध्ययनप्रति उत्साह जगाउने अपेक्षा गरिएको छ।
यो विषयमा आफ्नो प्रतिक्रिया दिनुहोस् !