जनकपुरधाम । प्रधानमन्त्री बालेन्द्र साह ‘बालेन’ छठ पर्वका अवसरमा जनकपुरधाम आउने सम्भावित कार्यक्रमलाई मध्यनजर गर्दै स्थानीय तहले स्वागत तथा व्यवस्थापनको तयारी अघि बढाएको छ। प्रधानमन्त्रीको भ्रमणलाई व्यवस्थित बनाउन जनकपुरधाम उपमहानगरपालिकाले नगर सौन्दर्यीकरणदेखि पूर्वाधार सुधारसम्मका कामलाई तीव्रता दिएको हो।

भ्रमणको तयारीस्वरूप उपमहानगरपालिकाले नगरका विभिन्न स्थानमा सरसफाइ अभियान सञ्चालन गर्नुका साथै सडक किनारका पोलमा बत्ती जडान, सार्वजनिक स्थलको व्यवस्थापन तथा विमानस्थलदेखि गंगासागरसम्मका क्षेत्रमा रङरोगनको काम अगाडि बढाएको छ।

यसअघि प्रधानमन्त्रीको भ्रमण व्यवस्थापनबारे छलफल गर्न उपमहानगरपालिकामा सरोकारवाला निकायको संयुक्त बैठक बसेको थियो। नगरप्रमुख मनोज साहको अध्यक्षतामा भएको उक्त बैठकमा सहरी विकास कार्यालय, सडक डिभिजन कार्यालय, जिल्ला प्रशासन कार्यालयका प्रतिनिधि, उपमहानगरपालिकाका बोर्ड सदस्यलगायतको सहभागिता रहेको थियो।

बैठकले प्रधानमन्त्रीको सम्भावित भ्रमणलाई ध्यानमा राख्दै सम्बन्धित निकायलाई आ–आफ्नो जिम्मेवारीअनुसार तयारी गर्न निर्देशन दिएको थियो। नगर सरसफाइ, सार्वजनिक स्थलको व्यवस्थापन, सडकबत्ती जडान र रङरोगनलाई उपमहानगरपालिकाले प्राथमिकतामा राखेको बैठकमा सहभागी बोर्ड सदस्य तथा वडा नम्बर ७ का अध्यक्ष निरज साह ‘मुन्ना’ले जानकारी दिए।

उनका अनुसार छठ पर्वका दिन प्रधानमन्त्री जनकपुरधाम आउने कार्यक्रम रहेकाले भ्रमणका क्रममा कुनै असुविधा नहोस् भन्ने उद्देश्यले आवश्यक व्यवस्थापन मिलाउन सम्बन्धित कार्यालयहरूलाई जिम्मेवारी बाँडफाँट गरिएको छ।

बैठकमा प्रधानमन्त्री साहले गंगासागरमा पुगेर छठी माताको पूजाआजा गर्ने र त्यसपछि यात्री निवासमा विश्राम गर्ने कार्यक्रम रहेको जानकारीसमेत गराइएको अध्यक्ष साहले बताए।

उपमहानगरपालिकाले आफ्नो क्षेत्राधिकारभित्र पर्ने सरसफाइ, बत्ती जडान तथा नगर सौन्दर्यीकरणका काम अघि बढाइरहेको छ। सडक मर्मतसम्भारको जिम्मेवारी सडकसम्बन्धी कार्यालयलाई दिइएको छ भने प्रधानमन्त्रीको बसाइ तथा अन्य व्यवस्थापनका विषयमा सहरी विकास कार्यालयलाई जिम्मेवारी दिइएको बुझिएको छ।

प्रधानमन्त्रीको जिम्मेवारी सम्हालेपछि बालेनको यो जनकपुरधाममा पहिलो भ्रमण हुनेछ। यसअघि प्रतिनिधिसभा निर्वाचनको प्रचारप्रसारका क्रममा उनी जनकपुरधामको तिरहुतिया गाछीमा आयोजित कार्यक्रममा सहभागी भएका थिए। त्यसैगरी, मधेशको दोस्रो भ्रमणका क्रममा पनि उनी जनकपुरधाम आएका थिए। तर, त्यसबेला उनले जनकपुरधाममा बसाइ भने गरेका थिएनन्।

यद्यपि, प्रधानमन्त्रीको भ्रमणबारे जिल्ला प्रशासन कार्यालय धनुषाले भने औपचारिक जानकारी प्राप्त नभएको जनाएको छ। प्रमुख जिल्ला अधिकारी प्रेमप्रसाद लुइँटेलले प्रधानमन्त्री जनकपुरधाम आउने विषयमा हालसम्म कार्यालयमा कुनै औपचारिक पत्र वा जानकारी नआएको बताए।

उनले सञ्चारमाध्यममार्फत छठ पर्वका अवसरमा प्रधानमन्त्री जनकपुरधाम आउने भन्ने खबर सुनेको भए पनि प्रशासनिक रूपमा त्यसको औपचारिक जानकारी प्राप्त नभएको स्पष्ट पारे।

यसरी प्रधानमन्त्रीको भ्रमणबारे प्रशासनिक निकायबाट औपचारिक पुष्टि हुन बाँकी रहेकै अवस्थामा जनकपुरधाम उपमहानगरपालिकाले भने सम्भावित आगमनलाई लक्षित गरी तयारीलाई निरन्तरता दिएको छ।