जनकपुरधाम, ४ असोज । मधेश प्रदेशका अर्थमन्त्री युवराज भट्टराईले ईट्टा व्यवसायीहरुको समस्या समाधान गर्न प्रदेश सरकार प्रयास रहेको बताएका छन् ।
नेपाल ईट्टा उद्योग महासंघ मधेशको चौथो महाधिवेशनको उद्घाटन सत्रमा बोल्दै मन्त्री भट्टराईले भने प्रदेश सरकारको दायित्व कर उठाउने मात्र नभई व्यवसायी सहित प्रत्येक नागरिकलाई सेवा–सुविधा प्रदान गर्नु पनि दायित्व रहेको बताएका छन् ।
व्यवसायीबाट कर उठाउने मात्र नभई व्यवसाय कसरी टिकाउ बनाउन सकिन्छ भन्ने दिशामा समेत राज्यले काम गर्नुपर्ने बताए । कुनै पनि व्यवसायलाई संरक्षण गर्ने दिशामा प्रदेश सरकार प्रतिबद्ध रहेको बताउँदै उनले नेपालमा आत्मनिर्भर रहेको ईटा उद्योगबाट पछिल्लो समय व्यवसायी पलायन भइरहेकोप्रति चिन्ता व्यक्त गरे ।
ईटा व्यवसाय दिनप्रतिदिन घट्दै जानुको कारण पहिचान गरी समस्या समाधानका लागि ईटा व्यवसायीसँग सहकार्य गर्न प्रदेश सरकार तयार रहेको उनले बताए । उनले ईटा व्यवसायीलाई प्रविधिमैत्री बन्नसमेत आग्रह गरे ।
महासंघको चौथो महाधिवेशनको उद्घाटन सत्रमा सहभागी वक्ताहरूले मधेशमा करिब ७ सय ईटा उद्योग रहेकामा अहिले ३ सय २० उद्योग मात्र सञ्चालनमा रहेको बताएका थिए ।
कोरोना महामारीपछि देखिएको आर्थिक मन्दी र राज्यबाट उचित सहयोग नपाउँदा ३ सय ८० ईटा उद्योग बन्द भएको उनीहरूको गुनासो थियो । उद्योग बन्द हुँदा करिब ८० हजार रोजगारीसमेत गुमेको उनीहरूले बताएका थिए ।
नेपाल ईटा उद्योग महासंघ मधेशका अध्यक्ष विक्रम साहको अध्यक्षतामा भएको उद्घाटन सत्रमा जनकपुरधामका नगरप्रमुख मनोजकुमार साह, नेपाल ईटा उद्योग महासंघका केन्द्रीय अध्यक्ष कृष्णप्रसाद अवाल, संस्थापक अध्यक्ष महेन्द्रबहादुर चित्रकारलगायतको उपस्थिति थियो ।
कार्यक्रममा महासचिव अशोक कुमार जयसवालले सांगठनिक प्रतिवेदन र कोषाध्यक्ष रामबाबु पजियारले आयव्ययसहितको लेखा प्रतिवेदन प्रस्तुत गरेका थिए ।
यो विषयमा आफ्नो प्रतिक्रिया दिनुहोस् !